शिक्रापूर: कारची धडक बसून झालेल्या अपघातात महिलेचा जागीच मृत्यू झाला, तर मुलगा बचावला. ही घटना पिंपळे जगताप (ता. शिरूर) येथील शिक्रापूर चाकण रस्त्यावर घडली. अश्विनी गणेश सासवडे (वय २८ रा. पिंपळे जगताप ता. शिरुर जि. पुणे) असे अपघातात ठार झालेल्या महिलेचे नाव असून मुलगा रुद्र हा बचावला आहे. याबाबत गणेश बाळासाहेब सासवडे (वय ३५ रा. पिंपळे जगताप ता. शिरुर जि. पुणे) यांनी शिक्रापूर पोलीस स्टेशन येथे फिर्याद दिल्याने पोलिसांनी बोलेरो जीपच्या चालकावर गुन्हा दाखल केला आहे.
पिंपळे जगताप (ता. शिरुर) येथील शिक्रापूर चाकण रस्त्यारुन गितांजली हॉटेलमधून अश्विनी सासवडे या त्यांच्या मुलाला सोबत घेऊन दुचाकीहून शिक्रापूर बाजूकडे जात होत्या, त्यावेळी शिक्रापूर बाजूने भरधाव वेगाने आलेल्या बोलेरो वाहनाची अश्विनी यांच्या दुचाकीला जोरदार धडक बसली. दरम्यान समोरील वाहन भरधाव वेगाने आपल्या दुचाकीवर येत असल्याचे पाहून पाठीमागे बसलेल्या मुलगा रुद्र याने दुचाकीहून उडी मारून बाजूला गेला.
अपघातात दुचाकीचा चक्काचूर झाला, तर बोलेरो रस्त्याच्या कडेला चारीमध्ये गेली. यावेळी बोलेरो वाहन चालक वाहन सोडून पळून गेला. दरम्यान नागरिकांनी जखमी अश्विनी सासवडे यांना उपचारासाठी खासगी रुग्णालयात दाखल केले असता डॉक्टरांनी अश्विनी यांचा उपचारापूर्वी मृत्यू झाल्याचे घोषित केले. पुढील तपास पोलीस हवालदार गणेश करपे हे करत आहेत.
