यवत: पुणे – सोलापूर महामार्गा शेजारी असलेल्या सेवा रस्त्यावर मॉर्निंग वॉकसाठी गेलेल्या शुभांगी महामुनी यांचा अज्ञात वाहनाने धडक दिल्याने जागीच मृत्यू झाल्याची दुर्दैवी घटना यवत येथे घडली.
याबाबत अधिक माहिती अशी की, यवत येथील आदर्श क्लाथ सेंटरचे मालक राजेंद्र महामुनी व त्यांच्या पत्नी शुभांगी महामुनी हे रोज हे मॉर्निंग वॉकसाठी पुणे सोलापूर राष्ट्रीय महामार्ग शेजारी असलेल्या सेवा रस्त्यावर जात असे. शनिवारी पहाटे देखील नेहमीप्रमाणे साडेपाच – सहाच्या सुमारास दोघेही चालण्यासाठी गेले. पती राजेंद्र महामुनी हे पुढे चालत गेले तर घरी काही काम असल्याने शुभांगी महामुनी घरी परतत असताना जुन्या बँक ऑफ महाराष्ट्र समोरील सेवा रस्त्यावर अज्ञात वाहनाने त्यांना जोरदार धडक दिली. यावेळी शुभांगी महामुनी यांच्या डोक्यास गंभीर दुखापत झाल्याने त्यांचा जागीच मृत्यू झाला. पहाटेच्या सुमारास वर्दळ कमी असल्याने धडक दिलेले वाहन जोरात निघून गेले.
दरम्यान, घटनास्थळी नागरिकांनी मोठी गर्दी केली होती. घटनेची माहिती मिळताच यवत परिसरात सर्वत्र शोककळा पसरली. यवत बाजारपेठेतील सुप्रसिद्ध आदर्श क्लॉथ सेंटरचे महामुनी कुटुंबीयांशी सर्वांचे आपुलकीचे नाते असल्याने सकाळपासूनच गावातील सर्व व्यवहार बंद ठेवण्यात आले होते. शुभांगी महामुनी यांच्या पश्चात पती, मुलगा, मुलगी, नातू असा परिवार आहे.
