भिगवण ता.४: भिगवण मधील अंतर्गत रस्त्यांवर निर्माण झालेले खड्डे बुजविण्याकडे ग्रामपंचायतचे दुर्लक्ष होत असल्याने अनेक रस्त्यांवर खड्ड्यांचे साम्राज्य निर्माण झाले आहे. गावातील रस्त्यावर मधोमध तसेच बाजूने अनेक खड्डे पडले असून हे खड्डे अपघातास आमंत्रण देत आहेत.
मात्र याकडे ग्रामपंचायत प्रशासनाने कानाडोळा केला असल्याने या खड्ड्यापासून धोका होण्याची शक्यता नाकारता येत नाही. मेन पेठेतील रस्ता, हायस्कूल रस्ता, मारुती मंदिर रस्ता, आदर्श विद्यालय रस्ता, मंगलदृष्टी रस्ता, बस स्थानक परिसर रस्ता, वायसे वस्ती परिसर या रस्त्यांवर मोठंमोठे खड्डे निर्माण झाले आहेत. गावातील बहुतांश नागरिक याच रस्त्यावरून ये-जा करीत असतात.
विशेष म्हणजे या खड्ड्यावर, अपघात होऊ नये म्हणून बॅरिगेट लावण्याची किंवा इतर व्यवस्था करण्याची तसदीही येथील ग्रामपंचायतीने घेतली नाही. अंतर्गत रस्त्यावर लहान-मोठे खड्डे पडल्याने पादचाऱ्यांसह वाहन चालकांनाही वाहन चालविणे मुश्किल झाले असल्याने हे खड्डे कधी बुजविणार? असा प्रश्न भिगवणकरांना पडला आहे.
हायस्कुल रोडवर वाहनचालकांची तसेच ग्रामस्थांची मोठी रहदारी असते. परंतु या रस्त्याची देखील खूपच दुरावस्था झाली असल्याने पावसाचे पाणी साचत आहे. त्यामुळे जाणाऱ्या येणाऱ्या लोकांच्या अंगावर देखील खड्ड्यातील पाणी उडत असल्याने नागरीकांमधून संताप व्यक्त केला जात आहे.
गावाचा विकास लोकप्रतिनिधींवर अवलंबून असतानाही येथील विकासकामे ठप्प पडली आहेत. लोकप्रतिनिधींनी विकासाकडे लक्ष देण्याची मागणी ग्रामस्थांमधून होत आहे.
येत्या आठवडाभरात भिगवण ग्रामपंचायतने गावातील अंतर्गत रस्त्यांवरील खड्डे बुजवून डागडुजी, दुरुस्ती केली नाही तर त्याच खड्यांमध्ये वृक्षारोपण करून गांधीगिरी मार्गाने आंदोलन करण्यात येईल.
-दिपीका क्षीरसागर, माजी सरपंच, भिगवण
