पुणे : ‘पुणे तिथे काय उणे’ असं आपण खूपदा ऐकत असतो. त्याची प्रचिती सुद्धा आपल्याला येत असते. पुण्यात असे बरेच प्रकार घडत असतात. या सर्व प्रकारात चर्चचा विषय ठरतात त्या म्हणजे पुणेरी पाट्या. अशीच एक पाटी सद्या चर्चेत आली आहे. एका तरूणाने ही पाटी हातात घेऊन एका चोराला भावनिक साद घातली आहे. पुण्यातील एका तरूणाची दुचाकी चोरीला गेली आहे, ती दुचाकी त्याला त्याच्या आईने घेतलेली असून त्याच्या आईची ती शेवटची आठवण आहे. त्यामुळे या तरूणाने हातात एक पाटी घेऊन त्यावर लिहून दुचाकी चोराला विनंती केली आहे.
मिळालेल्या माहितीनुसार, दसऱ्याच्या दिवशी तरूणाची दुचाकी संध्याकाळी सातच्या सुमारास कोथरूड कर्वे पुतळा परिसरात बंद पडली. त्यानंतर त्याने आपली दुचाकी कोथरूड गावठाणलगत असलेल्या कमानीच्या रस्त्याजवळ मित्राच्या घराजवळ लावली होती. रविवारी दिवसभर कामांमुळे त्याला दुचाकी आणायला वेळ मिळाला नाही. ज्या मित्राच्या घराजवळ दुचाकी लावली होती, तो रात्री घरी परतला तेव्हा त्याला दुचाकी दिसली नाही. त्यानंतर तरूणाने आणि त्याच्या मित्राने गाडीची शोधा-शोध केली. मात्र, दुचाकी सापडली नाही. जवळच्या पोलिस चौकीत देखील त्यांनी दुचाकीचा शोध घेतला. परंतु, ती न मिळाल्याने अखेर त्यांनी पोलिस ठाण्यात तक्रार दाखल केली. ही दुचाकी त्याच्या आईची आठवण असल्याने ती परत करण्यासाठी पोस्टर तयार करून चोराला भावनिक साद या तरुणाने घेतली आहे.
नेमका प्रकार काय?
अभय चौगुले असं हातात फलक घेतलेल्या तरूणाचे नाव आहे. कोथरूड परिसरातील छत्रपती शिवाजी महाराजांच्या पुतळ्याजवळ कोथरूड गावठाण कमानीच्या रस्त्यालगत त्याची दुचाकी चोरीला गेली. तरूणाने त्याच्या मित्रांसोबत आसपासच्या परिसरात दुचाकीचा शोध घेतला; मात्र, गाडी कुठेच मिळाली नाही त्यानंतर त्याने पोलिस ठाण्यात तक्रार दाखल केली. त्यानंतर त्याने दुचाकी चोरीला गेल्याचा फलक हातात घेऊन तो रस्त्यावर उभा राहिला आहे. या फलकासोबतचे त्याचे फोटो आणि फलकावर लिहलेला मजकूर सद्या मोठ्या प्रमाणावर सोशल मिडियावर व्हायरल होत आहे. चोराला त्याची दुचाकी परत करण्याची विनंती त्याने केली आहे.
फलकावर काय लिहलंय?
फलकावर तरूणाने चोराला भावनिक साद घालत गाडी परत करण्याची विनंती केली आहे. यामध्ये त्याने आपला फोन नंबर आणि दुचाकीचा नंबर लिहला असून माझी गाडी चोरणाऱ्या चोराला नम्र विनंती, आईने खुप कष्ट करून 12 वित गाडी घेतली होती, आईची शेवटची आठवण आहे, Plz परत करा “Black Activa MH14B26036” M-9766617464
