पुणे : लोकसभा निवडणुकीत राष्ट्रवादी काँग्रेस पार्टी शरदचंद्र पवार या पक्षाला ‘तुतारी वाजवणारा माणूस’ हे निवडणूक चिन्ह देण्यात आलं होतं. तर अपक्ष उमेदवारांना या चिन्हाशी साम्य असलेलं ‘पिपाणी’ हे चिन्ह अनेक अपक्ष उमेदवारांना मिळालं होतं. ‘पिपाणी’ या चिन्हांतील गोंधळामुळे राष्ट्रवादी काँग्रेस पार्टी शरदचंद्र पवार या पक्षाला फटका बसला. सातारा लोकसभा मतदारसंघातील राष्ट्रवादीचे उमेदवार शशिकांत शिंदे पराभूत झाले, असा दावा राष्ट्रवादीचे प्रदेशाध्यक्ष जयंत पाटील यांनी केला होता.
त्यामुळे शरद पवारांच्या ‘राष्ट्रवादी’कडून निवडणुक आयोगाला पत्र लिहिलं आहे. पिपाणी या चिन्हाला निवडणूक चिन्हांच्या यादीत ‘तुतारी’ असं नाव आहे. तसेच चिन्हांमध्ये साम्य आहे. त्यामुळे विधानसभा निवडणुकीत पिपाणी चिन्ह वगळण्याची विनंती निवडणूक आयोगाकडे करण्यात आली आहे.
लोकसभा निवडणुकीत तुतारी वाजवणारा माणूस या चिन्हाबरोबरच अपक्ष उमेदवारांना ‘पिपाणी’ हे चिन्ह दिलं. या चिन्हाला ‘तुतारी’ हे नाव असल्याने मतदारांमध्ये मोठा गोंधळ उडाला होता. दरम्यान, ‘पिपाणी’ हे चिन्ह असलेल्या अपक्ष उमेदवारांना मोठ्या प्रमाणावर मतं मिळाली. त्यामुळे शरद पवार गटातील उमेदवारांचे नुकसान झाले, असा दावा पक्षातील नेत्यांनी केला आहे.
याच पार्श्वभूमीवर निवडणूक चिन्हांच्या यादीतून ‘पिपाणी’ हे चिन्ह हटवा अशी मागणी शरद पवार गटाने केली आहे. आयोगाला पाठवलेल्या पत्रात राष्ट्रवादी काँग्रेस पार्टी शरदचंद्र पवार पक्षाने म्हटलं आहे, की पिपाणी या चिन्हामुळे आम्हाला फटका बसला. त्यामुळे तुम्ही या संदर्भात उचित निर्णय घ्या, अन्यथा आम्ही सर्वोच्च न्यायालयात जाऊ, असा इशाराच देण्यात आला आहे.
काय म्हटलं आहे नेमकं पत्रात?
लोकसभा निवडणुकीत ‘पिपाणी’ चिन्हामुळे जो फटका बसला आहे. तो फटका विधानसभेला बसू नये, यासाठी राष्ट्रवादी काँग्रेस शरदचंद्र पवार पक्षाकडून दक्षता म्हणून निवडणूक आयोगाला पत्र पाठवले आहे. फ्री सिम्बॉलमधून ‘पिपाणी’ हे चिन्ह वगळण्याची विनंती करण्यात आली आहे.
फ्री सिम्बॉल मध्ये पिपाणी आणि तुतारी वाजवणारा माणूस या चिन्हाचा समावेश असल्याने अडचणी येत असल्याचा उल्लेख पत्रात केला आहे. तसेच याबाबत लवकरात लवकर निर्णय घ्यावा, अन्यथा न्यायालयाचे दार ठोठावणार असल्याचेही पत्रात नमूद केले आहे.
