संतोष गायकवाड
वाघोली, ता. ०८ : वाघोली येथील अनेक भागातील स्ट्रीट लाईट बंद आहेत. त्याचबरोबर अंतर्गत रस्त्यांची दुरावस्था झाली आहे. पदपथावरील दिवे तातडीने सुरु करून रस्ते दुरुस्त करण्यात यावे, अशी मागणी माजी उपसरपंच संदीप सातव यांनी निवेदनाद्वारे पुणे महापालिकेचे नगर रोड क्षेत्रीय कार्यालयाचे सहाय्यक आयुक्त सोमनाथ बनकर यांच्याकडे केली आहे.
वाघोली गाव पुणे महानगरपालिकेत समाविष्ट होऊन दोन वर्ष झाली. परंतु, अनेक भागातील पदपथावरील दिवे बंद आहेत. तसेच अनेक भागातील अंतर्गत रस्ते अत्यंत खराब झाले आहेत. नागरिकांना विविध समस्यांचा सामना करावा लागत आहे. पुणे महानगरपालिका अधिकारी यांच्याकडे सातव यांनी अनेकवेळा पाठपुरावा केला. मात्र, समस्या मार्गी लागल्या नाहीत.
दरम्यान, लवकरच पदपथावरील दिवे चालू करावे व अंतर्गत रस्त्यांचा प्रश्न मार्गी लावावा, अशी मागणी संदीप सातव यांनी लेखी निवेदनाद्वारे केली.
