पुणे : नागरिकांना मारहाणकरून त्यांना लुटणाऱ्या भामट्याला विमानतळ पोलिसांनी अटक केली आहे. डी. वाय. पाटील कॉलेज समोरील सार्वजनिक रोडवर गुरुवारी (दि.8) सायंकाळी पाच वाजण्याच्या सुमारास लोहगाव येथे एका नागरिकाला दोन चोरट्यांनी लुटले. जबरदस्तीने त्याच्या खिशातील पैसे चोरले.
याबाबत मुस्ताक शेख ( वय 35, रा. गोल्डन विंग सोसायटी, लोहगाव ) यांनी विमानतळ पोलीस ठाण्यात लुटमारीची तक्रार दाखल केली. पोलिसांनी तपासादरम्यान, अभय पारडे (वय-22 रा. एम.एम.आय.टी. समोर, लोहगाव) याला अटक केली आहे. राखपसरे वस्ती येथे राहणाऱ्या अल्पवयीन साथीदारासह त्याने हा गुन्हा केला.
तक्रारीत काय म्हटले
फिर्यादी मुस्ताक शेख हे लोहगाव येथील डी. वाय. पाटील कॉलेज समोरील सार्वजनिक रोडवर फेरफटका मारण्यासाठी गेले होते. त्यावेळी रस्त्यावर बसलेला आरोपी अभय पारडे याने फिर्यादी यांना अडवले. खिशातील पैशांचे पाकिट आणि मोबाईल काढून देण्यास सांगितले. त्यावर, फिर्यादी मुस्ताक शेख यांनी पाकिट आणि मोबाईल देण्यास नकार दिला. याचा राग आल्याने आरोपींनी शिवीगाळ करुन त्यांना हाताने मारहाण केली. तसेच जबरदस्तीने पॅन्टच्या खिशातून एक हजार रुपये काढून घेतले. या घटनेनंतर त्यांनी दुचाकीवरुन पळ काढला. याबाबत शेख यांनी फिर्याद देताच पोलिसांनी तपास करून आरोपींचा शोध घेऊन अटक केली. पुढील तपास सहायक पोलीस निरीक्षक तोरडमल करत आहेत.
