पुणे : ज्येष्ठ पत्रकार विजय भोसले (वय-६१) यांचे आज सोमवारी हृदय विकाराच्या झटक्याने निधन झाले आहे. त्यांच्या निधनामुळे पत्रकारिता क्षेत्राला धक्का बसला असून पुणे आणि पिंपरी परिसरातील सामाजिक, व राजकीय क्षेत्रातून हळहळ व्यक्त होते आहे.
विजय भोसले हे चार दिवसांपूर्वी भोसरीतील एका रुग्णालयाच्या उद्घाटनला वार्तांकनासाठी गेले होते. तेव्हा तिथेच त्यांना अस्वस्थ वाटू लागल्याने उपचारासाठी दवाखान्यात दाखल करण्यात आले होते. त्यानंतर वायसीएम रुग्णालयात त्यांना हलविण्यात आले.
उपचार सुरु असताना आज सकाळी त्यांची हृदयविकाराचा झटका आल्याने प्राणज्योत मालवली. त्यांच्या पश्चात पत्नी, मुलगा, मुलगी असा परिवार आहे.
विजय भोसले यांनी दीर्घकाळ पिंपरी चिंचवडमध्ये वार्तांकन केले आहे. पुण्यातल्या सांजसमाचार या वृत्तपत्रासाठी अल्पकाळ काम केल्यावर त्यांनी दीर्घ काल ‘केसरी’ वृत्तपत्रासाठी विविध पदांवर काम पाहिले आहे. तसेच विधीमंडळाच्या अधिवेशनांचेही त्यांनी उत्तम वार्तांकन केले आहे.
