उरुळी कांचन (पुणे) : पुणे-सोलापूर महामार्गावर सोलापूरच्या बाजूने निघालेल्या दुचाकीस्वाराला अज्ञात वाहनाने दिलेल्या धडकेत उरुळी कांचन (ता. हवेली) येथील एका ४७ वर्षीय व्यक्तीचा जागीच मृत्यू झाल्याची घटना घडली आहे.
कोरेगाव मूळ (ता. हवेली) ग्रामपंचायत हद्दीतील इनामदारवस्ती येथील गुरुदत्त नर्सरीजवळ मंगळवारी (ता. १२) रात्री सव्वा आठ वाजण्याच्या सुमारास ही घटना घडली आहे. या प्रकरणी मंगेश गिताराम खेडेकर (वय ३५, व्यवसाय शेती, रा. खेडेकरमळा, उरूळी कांचन, ता. हवेली) यांनी उरुळी कांचन पोलीस ठाण्यात फिर्याद दिली आहे.
नितीन एकनाथ खेडेकर (वय ५२, रा. खेडेकर मळा, उरुळी कांचन, ता. हवेली) असे अपघातात मृत्यू झालेल्या व्यक्तीचे नाव आहे. सदरचा अपघात एवढा भीषण होता की, त्यांचा जागेवरच मृत्यू झाला.
मिळालेल्या माहितीनुसार, नितीन खेडेकर हे हडपसर येथील एका खासगी कंपनीत कामाला होते. वैयक्तिक काम आटोपून उरुळी कांचन या ठिकाणी निघाले होते. या वेळी पाठीमागून आलेल्या भरधाव वाहनाने खेडेकर यांच्या दुचाकीला जोरदार धडक दिली. या अपघतात त्यांच्या डोक्याला, हाताला, मोठ्या प्रमाणात गंभीर दुखापत झाली होती. हा अपघात एवढा भीषण होता की, या अपघातात त्यांचा जागेवरच मृत्यू झाला.
दरम्यान, हा अपघात नेमका कसा झाला हे अद्याप समजू शकलेले नाही. मनमिळावू स्वभावामुळे त्यांना सर्वजण परिचित होते. त्यांच्या पश्चात आई, पत्नी, तीन मुली, एक मुलगा असा परिवार आहे. या घटनेने परिसरात हळहळ व्यक्त करण्यात येत आहे.
