Uruli Kanchan : उरुळी कांचन येथील कस्तुरी प्रतिष्ठानचे सचिव व सामाजिक कार्यकर्ते शंकर पांडुरंग पाटील (वय 48) यांनी राहत्या घरी गळफास घेऊन आत्महत्या केल्याची धक्कादायक घटना रविवारी सकाळी उघडकीस आली. घटनास्थळी सापडलेल्या चिठ्ठीत “माझ्या मृत्यूसाठी कोणालाही जबाबदार धरू नये” असा स्पष्ट उल्लेख करत त्यांनी जीवनयात्रा संपवली. या घटनेमुळे उरुळी कांचन परिसरात हळहळ व्यक्त होत असून सामाजिक क्षेत्रात शोककळा पसरली आहे.
मिळालेल्या माहितीनुसार, आश्रम रोड परिसरातील राहत्या घरात रविवारी सकाळी सुमारे नऊच्या सुमारास हा प्रकार समोर आला. शंकर पाटील यांनी आत्महत्येपूर्वी लिहून ठेवलेल्या चिठ्ठीत आपल्या मानसिक वेदना आणि जीवनातील धक्कादायक प्रसंगांचा उल्लेख केला आहे. “माझ्या मरणास कोणीही जबाबदार नाही. मी स्वतःच्या इच्छेने हा निर्णय घेत आहे,” असे त्यांनी स्पष्ट नमूद केले आहे.
चिठ्ठीत त्यांनी भारतात इच्छामरणाचा कायदा नसल्याची खंत व्यक्त करत, “मला जिवंतपणीच अवयवदान करायचे होते. माझ्या अवयवांमुळे चार-पाच लोकांचे आयुष्य वाचले असते. भारतात इच्छामरणाचा कायदा असावा,” अशी भावना व्यक्त केली आहे. तसेच, “माझे अवयव दान होत असतील तर ते करावेत,” अशी इच्छाही त्यांनी व्यक्त केली आहे.
चिठ्ठीत पुढे त्यांनी आपल्या आयुष्यात साथ दिलेल्या अनेक मित्रांचे आणि सहकाऱ्यांचे मनापासून आभार मानले आहेत. आई-वडील, नातेवाईक व मित्रांची माफी मागत “माझ्या या निर्णयामुळे तुम्हाला त्रास होणार असेल तर मला माफ करा,” असे भावनिक शब्द त्यांनी लिहिले आहेत.
चिठ्ठीत नमूद केल्याप्रमाणे, “संजूच्या निधनानंतर माझी जगण्याची इच्छा उरली नाही. त्या घटनेचा मला मोठा मानसिक धक्का बसला. त्यातून मी अजूनही बाहेर आलो नाही. त्यानंतर झालेल्या अपघातामुळे माझी मानसिक अवस्था अधिकच खालावली. मला झोप येत नाही, रोज देवाकडे मरण मागत आहे,” असेही त्यांनी नमूद केले आहे. वृद्ध आई-वडिलांची सेवा करता न आल्याची खंतही त्यांनी व्यक्त केली आहे.
दरम्यान, शंकर पाटील हे अविवाहित असून सामाजिक कार्यात सक्रिय होते. कस्तुरी प्रतिष्ठानच्या माध्यमातून सामुदायिक विवाह सोहळे, आषाढी वारीदरम्यान वारकऱ्यांसाठी अन्नदान सेवा तसेच विविध सामाजिक उपक्रमांमध्ये ते सातत्याने पुढाकार घेत असत. त्यांच्या आकस्मिक निधनाने उरुळी कांचन परिसरात शोककळा पसरली आहे. या घटनेची नोंद उरुळी कांचन पोलीस ठाण्यात करण्यात आली असून पुढील तपास सुरू आहे.
