यवत (पुणे) : यवत येथे धूम स्टाइलने चोरीचे प्रकार घडले आहे. शहरात दोन वेगवेगळ्या ठिकाणी मॉर्निंग वॉक करण्यासाठी गेलेल्या दोन महिलांच्या गळ्यातील सुमारे 1 लाख 50 हजार रुपये किंमतीचे सोन्याचे गंठण व चैन दुचाकीवर आलेल्या दोन अज्ञात चोरट्यांनी हिसकावून नेल्याची घटना घडली आहे.
रविवारी (दि.23) रोजी सकाळी 6.30 च्या सुमारास हेमा सुरेश रणशुर ( यशवंत नगर) या यवत स्टेशन रोड येथे मॉर्निंग वॉकवरून परत घरी येत असताना एका दुचाकीवरून आलेल्या दोन चोरट्यांपैकी मागे बसलेल्या चोरट्यांनी हेमा रणशूर यांच्या गळ्यातील दागिने चोरले आहे. त्यामध्ये एक तोळ्याचे मिनी गंठण व अर्धा तोळ्याची चैन हिसकावून पलायन केले. तर पुणे सोलापूर राष्ट्रीय महामार्ग शेजारी सेवा रस्त्यावरून अंगणवाडी सेविका असलेल्या संध्या रविंद्र शिंदे या देखील मॉर्निंग वॉक वरून घरी परत असतानाच घराजवळच त्यांच्या गळ्यातील सोन्याचे गंठण हिसकावून दोन अज्ञात चोरट्यांनी पलायन केले.
याबाबत यवत पोलिस स्टेशन येथे फिर्याद दिली असल्याची माहिती मिळत आहे. कायम वर्दळीच्या रस्त्यावरच एकाच दिवशी दोन ठिकाणी अशा प्रकारच्या घटना घडल्या असल्याने यवत परिसरात खळबळ उडाली आहे.
