लोणी काळभोर : जेजुरी – बेल्हे महामार्गावर दुचाकी आणि आयशर टेम्पोचा भीषण अपघात झाल्याची धक्कादायक घटना शिक्रापूर जवळच्या धामारी (ता.३) ग्रामपंचायत हद्दीत शुक्रवारी रात्री घडली आहे. या अपघातात मायलेकांसह ३ जणांचा मृत्यू झाला आहे.
संकेत दिलिप डोके, आई विजया दिलिप डोके आणि मित्र ओंकार चंद्रकांत सुक्रे (खडकवाडी , ता. आंबेगाव) अशी मृत्यू झालेल्यांची नावे आहेत. या घटनेमुळे खडकवाडी गावावर शोककळा पसरली आहे.
मिळालेल्या माहितीनुसार, संकेत डोके हा आई विजयाला शिक्रापूर येथे सोडवायला निघाला होता. त्यावेळी जेजुरी – बेल्हे महामार्गावरून जात असताना दुचाकी आणि आयशर टेम्पोचा भीषण अपघात झाला. हा अपघात इतका भीषण होता की, या अपघातात संकेतची आई, संकेत आणि त्याचा मित्र यांचा जागीच मृत्यू झाला.
दरम्यान, या अपघाताची माहिती मिळताच शिक्रापूर पोलिस तातडीने घटनास्थळी दाखल झाले, पोलिसांनी तातडीने पंचनामा करून तिघांचे मृतदेह ग्रामीण रूग्णालयात शवविच्छेदनासाठी पाठविले आहे. पुढील तपास शिक्रापूर पोलीस करीत आहेत.
