पिंपरी : वाहतूक पोलिसांनी रिक्षावर दंड केला म्हणून दोन रिक्षाचालकांनी मिळून पोलिसांसोबत असलेल्या ट्रॅफिक वॉर्डनाला लाकडी बांबूने मारहाण केली. ही घटना भोसरी येथे बुधवारी (दि. १६) दुपारी साडेचार वाजताच्या सुमारास घडली. मलींद भाईदास पिंपळे (वय ३२ रा. शिवशंकर कॉलनी, चक्रपाणी वसाहत, भोसरी) असे मारहाणीत जखमी झालेल्या ट्रॅफिक वॉर्डनचे नाव आहे. सुमित ऊर्फ सुम्या आणि सुभाष ऊर्फ सुभ्या (पूर्ण नाव, पत्ता माहीत नाही) अशी गुन्हा दाखल झालेल्या आरोपीची नावे आहेत.
बुधवारी दुपारी साडेचार वाजताच्या सुमारास फिर्यादी हे भोसरी येथील पुलाखालून चालले होते. त्यावेळी आरोपींनी फिर्यादी यांना आवाज देऊन थांबविले. रिक्षा चालक सुमित ऊर्फ सुम्या याच्या रिक्षावर फिर्यादी यांनी पोलिसांना १० हजार रुपयांचा दंडकरायला लावला असा समज आरोपींचा झाला. आता दंड तूच वसूल करुन मला दे, असे म्हणत फिर्यादी यांना लाकडी दांडक्याने दोघांनीही मारहाण करून जखमी केले. भोसरी पोलीस याबाबत अधिक तपास करीत आहेत.