चाकण (पुणे): दावडी (ता. खेड) येथे एका १६ वर्षीय अल्पवयीन मुलीला जिवे मारण्याची धमकी देऊन जबरदस्ती करण्याचा प्रयत्न केल्याप्रकरणी दोन आरोपींवर विनयभंग व पोक्सो कायद्यांतर्गत गुन्हा दाखल करून दोघांना अटक केली. ऋतिक बाळासाहेब दौंडकर (वय १९) व निखिल दत्तात्रय दौंडकर (वय १९, दोघे रा. दौंडकरवाडी, ता. खेड) अशी अटक आरोपींची नावे आहेत.
याबाबत खेड पोलिसांनी दिलेल्या माहितीनुसार, पीडित अल्पवयीन मुलीला २४ ऑगस्ट रोजी रात्रीच्या सुमारास ऋतिक दौंडकर याने फोन करून ‘तू माझ्या सोबत चल, तू जर आली नाही तर तुला जिवे ठार मारीन,’ अशी धमकी देत घराबाहेर बोलावून घेतले. मोटार सायकलवर बसवून दावडी परिसरातील फॉरेस्टच्या जागेत नेले. पीडितेच्या मर्जीविरुद्ध जबरदस्तीने मनास लज्जा उत्पन्न होईल असे कृत्य केले. निखिल दौंडकर याने या प्रकाराला मदत केली. मुलगी घरात नाही, हे कुटुंबाला समजल्यावर शोध घेतला. पहाटे ४ वाजण्याच्या सुमारास घरापासून काही अंतरावर माळावर गेले असता कुटुंबीय आल्याचे पाहून ऋतिक दौंडकर व निखिल दौंडकर यांनी पीडित मुलीस मोटारसायकलवरून खाली ढकलून दिले. यामध्ये पीडित मुलगी जखमी झाली. पुढील तपास खेडच्या महिला पोलीस उपनिरीक्षक स्नेहल गुरव करीत आहेत.
