चिखली (पिंपरी): दुचाकीवरून जाणाऱ्या दोन तरुणांना अडवत चार ते पाच जणांच्या टोळक्याने मारहाण करत त्यांच्या जवळील 35 हजार रुपये रक्कम व आयफोन फोन हिसकावून घेतला. या प्रकरणी चिखली पोलिसांनी दोघांना अटक केली आहे. 31 डिसेंबर रोजी चिखलीतील मोरे वस्ती येथे ही घटना घडली.
या प्रकरणी अरबाज फिरोज पठाण (वय 18 रा चिंचवड) याने चिखली पोलीस ठाण्यात फिर्याद दिली आहे. फिर्यादीवरून पोलिसांनी पवन आणि शिवांग (दोघांचे वय 19, रा. चिखली) या दोघांना अटक केली आहे. तसेच त्यांच्या इतर साथीदारांवर देखील गुन्हा दाखल केला आहे.
पोलिसांनी दिलेल्या माहितीनुसार, फिर्यादी आणि त्यांचा मित्र हे दुचाकीवरून तळवडे येथे निघाले होते. त्यावेळी आरोपींनी त्यांना आवाज देत रस्त्यात थांबवले व दोघांकडे दारू पिण्यासाठी पैसे मागितले. यावेळी फिर्यादी यांनी माझ्याजवळ पैसे नाहीत असे सांगितल्यानंतर आरोपी दोघांनी शिवीगाळ करण्यास सुरुवात केली. त्यानंतर गाडीची चावी काढून घेत दोघांनाही लोखंडी रॉडने मारहाण करत गंभीर जखमी केले.
मारहाणीनंतर फिर्यादी खाली पडले असता त्यांच्या खिशामध्ये गाडी खरेदीसाठी असलेले 35 हजार रुपये आणि आयफोन काढून घेत तिथून आरोपींनी पळ काढला. याप्रकरणी पोलिसांनी दोघांना बेड्या ठोकल्या असून पोलीस पुढील तपास करत आहेत.
