लोणी काळभोर : जुन्या पुणे- सोलापूर महामार्गावर ट्रक चालकाने एका महिलेला धडक देऊन पुढील टेम्पो उडवण्याची घटना घडली आहे. ही घटना कदमवाकवस्ती (ता. हवेली) ग्रामपंचायत हद्दीतील इंदिरानगर परिसरात शनिवारी (ता. 11) सायंकाळी पाच वाजण्याच्या सुमारास घडली आहे. रेणुका बनसोडे (रा.घोरपडे वस्ती, कदमवाकवस्ती, ता. हवेली ) असे जखमी झालेल्या महिलेचे नाव आहे.
मिळालेल्या माहितीनुसार, रेणुका बनसोडे या जुन्या पुणे-सोलापूर महामार्गावरून पायी चालल्या होत्या, तेव्हा त्यांना ट्रक चालकाने जोरदार ठोकर मारली. आणि ट्रक तसाच पुढे जाऊन एका टेम्पोला धडकला. या अपघातात रेणुका बनसोडे या गंभीर जखमी झाल्या आहेत. नागरिकांनी त्यांना तात्काळ उपचारासाठी लोणी काळभोर येथील विश्वराज हॉस्पिटलमध्ये दाखल केले आहे. बनसोडे यांच्यावर उपचार सुरू असून त्यांच्या मणक्याला गंभीर मार लागला असल्याची माहिती समोर येत आहे. तर टेम्पो चालकाचे मोठ्या प्रमाणात नुकसान झाले आहे. दरम्यान, अपघात झाल्यानंतर ट्रक चालक हा घटनास्थळावरून पळून गेला आहे. तसेच तो दारू पिऊन भरधाव वेगाने ट्रक चालवीत असल्याची माहिती देखील समोर येत आहे.
