लोणी काळभोर: पुणे- सोलापूर राष्ट्रीय महामार्गावर कर्नाटकहून पुण्याच्या दिशेने माल वाहतूक करणाऱ्या ट्रक चालकाचा हृदयविकाराच्या झटक्याने मृत्यू झाला आहे. ही घटना लोणी काळभोर (ता. हवेली) ग्रामपंचायत हद्दीतील माळी मळा परिसरात मंगळवारी (२८ नोव्हेंबर) रात्री नऊ वाजण्याच्या सुमारास घडली आहे.
सतपाल झेटिंग कावळे ( वय -४५, रामलिंग मुडगड, ता. निलंगा. जी. लातूर) असे मृत्यू झालेल्या ट्रक चालकाचे नाव आहे.
मिळालेल्या माहितीनुसार, कावळे हे कर्नाटकाहून माल ट्रकमध्ये भरून पुण्याच्या दिशेने चालले होते. पुणे- सोलापूर महामार्गावरून जात असताना त्यांची ट्रक लोणी काळभोर ग्रामपंचायत हद्दीतील माळी मळा परिसरात आली असता त्यांच्या छातीत अचानक दुखू लागले. त्यानंतर त्यांनी ट्रक रस्त्याच्या बाजूला घेतली.
ट्रक रस्त्याच्या बाजूला घेतल्यानंतर ट्रक चालक कावळे खाली उतरले. कावळे यांनी त्यांच्या नातेवाईकांना फोन केला व माझ्या छातीत तीव्र वेदना होत आहेत, फोनद्वारे सांगितले. नातेवाईकांनी त्यांना जेवण करून थोड्यावेळ आराम करण्यास सांगितले. त्यानुसार कावळे जेवण केल्यानंतर झोपण्यासाठी गेले. त्यानंतर ते उठलेच नाहीत.
दरम्यान, या घटनेची माहिती स्थानिक नागरिकांनी लोणी काळभोर पोलीस व प्राथमिक आरोग्य केंद्रात दिली. या घटनेची माहिती मिळताच, लोणी काळभोर पोलीस ठाण्याचे साहित्य पोलीस निरीक्षक किशोर पवार, पोलीस हवालदार महावीर कुठे व प्राथमिक आरोग्य केंद्राचे डॉक्टर विकास बनसोडे तातडीने ॲम्बुलन्स घेऊन घटनास्थळी मदतीसाठी दाखल झाले. बनसोडे यांनी कावळे यांची तपासणी केली असता कावळे यांचा जागीच मृत्यू झाल्याचे सांगितले.
त्यानंतर लोणी काळभोर पोलिसांनी कावळे यांचा मृतदेह ताब्यात घेतला आणि कावळे यांचा मृत्यू शवविच्छेदन करण्यासाठी रुग्णालयात पाठविला आहे. शवविच्छेदनाचा अहवाल आल्यानंतर कावळे यांच्या मृत्यूचे कारण स्पष्ट होणार आहे.
