पुणे : भीमा-कोरेगाव येथे एक जानेवारी २०२४ रोजी जयस्तंभ अभिवादन कार्यक्रम होणार आहे. अभिवादन कार्यक्रमास राज्यभरातून आंबेडकरी चळवळीतील अनुनायी हजारोंच्या संख्येने उपस्थित राहणार आहेत. यामुळे दरवर्षी पुणे-नगर महामार्गावर वाहतूक कोंडी होते. कोंडी टाळण्यासाठी रविवारी (ता. ३१) दुपारी दोन वाजल्यापासून वाहतूकीत बदल करण्यात येणार आहेत. वाहतूक बदलाची माहिती देणारे फलक ठिकठिकाणी लावण्यात येणार असून, वाहनचालकांनी सहकार्य करावे , असे आवाहन वाहतूक शाखेचे पोलीस उपायुक्त विजयकुमार मगर यांनी केले आहे.
नगर रस्त्यावरील वाहतुकीतील बदल एक जानेवारी २०२४ रोजी रात्री बारा वाजेपर्यंत लागू राहणार आहेत. पुण्याकडून नगरकडे जाणाऱ्या वाहनांनी खराडी बाह्यवळण मार्गावरुन वळून मुंढवा, मगरपट्टा चौक, पुणे-सोलापूर रस्ता, केडगाव चौफुला, न्हावरा, शिरुरमार्गे नगर रस्त्याकडे जावे. सोलापूर रस्त्याने आळंदी, चाकणकडे जाणाऱ्या वाहनांनी हडपसर, मगरपट्टा चौक, खराडी बाह्यवळण मार्गावरुन विश्रांतवाडीकडे जावे. तेथून आळंदी आणि चाकणकडे जावे. मुंबईकडून नगरकडे जाणाऱ्या वाहनांनी वडगाव मावळ, चाकण, खेड, मंचर, नारायणगाव, आळेफाटामार्गे नगरकडे जावे. मुंबईहून नगरकडे जाणाऱ्या हलक्या वाहनांनी वडगाव मावळ, चाकण, खेड, पाबळ, शिरुरमार्गे नगरकडे जावे.
कोल्हापूर, सांगली, सातारा, कात्रजमार्गे मंतरवाडी फाटा, मगरपट्टा चौक येथून नगरकडे जाणाऱ्या वाहनचालकांनी हडपसर येथून केडगाव चौफुलामार्गे शिरुरकडे जावे. इंद्रायणी नदीवरील आळंदी-तुळापूर पूल जड वाहतुकीस बंद करण्यात आल्याने या पुलावरुन केवळ अनुयायांच्या हलक्या वाहनांना प्रवेश देण्यात येणार आहे. विश्रांतवाडी, लोहगावमार्गे वाघोलीकडे जाणारी जड वाहतूक बंद ठेवण्यात येणार आहे.
भीमा-कोरेगाव परिसरात वाहने लावण्याची ठिकाणे पुढीलप्रमाणे
लोणीकंद येथील आपले घर, बौद्ध वस्ती, मोनिका हॉटेलशेजारी, ओमसाई हॉटेलच्या पाठीमागे, तुळापूर फाटा स्टफ कंपनीशेजारी, राजेशाही मिसळ हॉटेलच्या मागे, तुळापूर रस्ता वाय पॉईंट, हॉटेल शेतकरी मिसळजवळ, तुळापूर फाटा हॉटेल रॉयल शेजारी, फुलगाव सैनिकी शाळा मैदान, सोमवंशी ॲकडमी, थेऊर रस्ता, खंडोबाचा माळ, पेरणे फाटा छत्रपती शिवाजी महाराज पुतळा.
