पुणे: बकरी ईदच्या पार्श्वभूमीवर पुणे शहरात काही ठिकाणी वाहतुकीत तात्पुरते बदल करण्यात आले आहेत. मुस्लिम बांधवांचा पवित्र सण ‘बकरी ईद’ बुधवार, १९ जून २०२५ रोजी साजरा करण्यात येणार असून, यानिमित्त गोळीबार मैदान आणि सेवन लव्ह चौक परिसरात सकाळी ६ वाजल्यापासून नमाज पठण पूर्ण होईपर्यंत काही प्रमुख रस्त्यांवर वाहतूक मर्यादा लागू करण्यात आली आहे. पोलिसांनी सुरक्षितता आणि वाहतूक सुरळीत राहण्यासाठी काही मार्ग बंद ठेवले असून, त्यासाठी पर्यायी मार्गांचीही व्यवस्था केली आहे.
वाहतूक बंद राहणारे रस्ते आणि पर्यायी मार्ग
बकरी ईदनिमित्त पुण्यातील वाहतूक व्यवस्थेत काही महत्त्वाचे बदल करण्यात आले आहेत. लुल्लानगर चौक ते गोळीबार मैदान हा मार्ग सकाळी ६ वाजल्यापासून बंद ठेवण्यात आला असून, या मार्गावर मालवाहू गाड्या, पीएमपीएमएल बस आणि जड वाहनांना प्रवेश बंदी असेल. या मार्गासाठी पर्यायी पर्याय म्हणून स्वारगेटकडे जाण्यासाठी प्रिन्स ऑफ वेल्स रोडमार्गे लुल्लानगर चौकाचा वापर करता येईल, तर पुणे रेल्वे स्टेशनकडे जाण्यासाठी इम्प्रेस गार्डन रस्त्याचा वापर सुचवण्यात आला आहे.
त्याचप्रमाणे, गर चौक ते गोळीबार मैदान हा मार्ग देखील बंद राहणार असून, या भागासाठी मम्मादेवी चौक–बिशप स्कूल किंवा कमांड हॉस्पिटलमार्गे पर्यायी मार्ग निवडता येईल. सीडीओ चौक ते गोळीबार मैदान मार्ग नमाज पठणाच्या काळात पूर्णतः बंद राहणार असून, लुल्लानगरहून येणाऱ्या वाहनांनी सीडीओ चौकात डावीकडे वळावे किंवा खटाव बंगला चौक मार्गे उजवीकडे वळून पुढे जावे.
सेवन लव्ह चौक ते गोळीबार मैदान हा मार्ग देखील बंद असून, या मार्गासाठी सॅलिसबरी पार्क–सीडीओ चौक–भैरोबा मार्ग पर्यायी म्हणून वापरता येईल. तसेच, जुना सोलापूर रस्ता चौकी चौक ते गोळीबार मैदान मार्ग बंद असणार आहे. या मार्गावरून प्रवास करणाऱ्यांनी खाणे मारुती चौक, पूलगेट डेपो, सोलापूर बाजार चौक आणि खटाव बंगला मार्गे मार्गक्रमण करावे, असे आवाहन वाहतूक विभागाने केले आहे.
पुणेकरांनी नमाज पठणावेळी होणाऱ्या वाहतूक बदलांची नोंद घ्यावी आणि दिलेल्या पर्यायी मार्गांचा वापर करावा, असे आवाहन वाहतूक विभागाकडून करण्यात आले आहे. सण साजरा करताना शांतता, संयम आणि सहकार्य राखावे, असेही प्रशासनाने सूचित केले आहे.
