पुणे: रात्रपाळीत गस्त घालणाऱ्या तीन पोलीस कर्मचाऱ्यांनी पाषाण भागातील एका सोसायटीच्या अध्यक्षाकडून तीन हजार रुपयांची लाच घेतल्याचा प्रकार नुकताच उघडकीस आला. या घटनेची गंभीर दखल घेऊन गुन्हे शाखेचे पोलीस उपायुक्त निखील पिंगळे यांनी तीन पोलीस कर्मचाऱ्यांना निलंबित करण्याचे आदेश दिले.
संतोष जगू शिंदे, प्रतीक महेश त्रिंबके, दिनेश संतोष इंगळे ही निलंबित करण्यात आलेल्या पोलीस कर्मचाऱ्यांची नावे आहेत. शहरातील गंभीर गुन्हे रोखण्यासाठी पोलीस आयुक्त अमितेश कुमार यांच्या संकल्पनेतून कॉप्स २४ ही योजना तीन महिन्यांपूर्वी शहरात कार्यान्वित करण्यात आली. या योजनेंतर्गत शहरातील वेगवेगळ्या भागांत गस्त घालण्यासाठी विशेष पथके तयार करण्यात आले आहेत. या पथकाची जबाबदारी आणि नियंत्रण गुन्हे शाखेचे पोलीस उपायुक्त निखील पिंगळे यांच्याकडे सोपविण्यात आले आहे.
पाषाण येथील शिवालय सोसायटीत १३ एप्रिल २०२४ ला वाहनतळाचे काम सुरू होते. ठेकेदाराला उशिरा यंत्र उपलब्ध झाल्याने रात्री उशिरा काम सुरू होते. त्यानंतर पोलीस कर्मचारी शिंदे, त्रिंबके, इंगळे गस्त घालणाऱ्या मोटारीतून तेथे गेले. त्यांनी सोसायटीच्या अध्यक्षांना बोलावून घेतले व रात्री उशिरा काम सुरू असल्याचा त्रास होत असल्याची तक्रार पोलीस नियंत्रण कक्षाकडे आली असल्याचे सांगितले. तसेच, यासंदर्भात जबाबासाठी बालेवाडी पोलीस चौकीत यावे लागेल, असे पोलिसांनी सांगितले. त्यानंतर, त्यांच्याकडे पाच हजार रुपयांची मागणी केली. अध्यक्षांनी तडजोडीत तीन हजार रुपये दिले.
यासंदर्भात सोसायटीकडून वरिष्ठ पोलीस अधिकाऱ्यांकडे तक्रार आली. त्याबाबत खंडणी विरोधी पथकाने तीन पोलीस कर्मचाऱ्यांची चौकशी केली. चौकशीत तिघा पोलीस कर्मचाऱ्यांनी सोसायटीच्या अध्यक्षांकडून पैसे घेतल्याचे निष्पन्न झाले. त्याबाबतचा अहवाल प्राप्त झाल्यावर या तिन्ही पोलिसांना निलंबित करण्याचे आदेश पोलीस उपायुक्त पिंगळे यांनी दिले.
