पुणे: पुणे कार अपघातप्रकरणी अटक करण्यात आलेल्या तीन आरोपींना पुण्याच्या विशेष न्यायालयाने 24 मे पर्यंत पोलिस कोठडी सुनावली आहे. तत्पूर्वी, पुणे पोलीस प्रमुखांनी मंगळवारी सांगितले की, महाराष्ट्राचे मुख्यमंत्री एकनाथ शिंदे आणि गृहमंत्री देवेंद्र फडणवीस यांनी 17 वर्षीय मुलाचा कथित सहभाग असलेल्या कार अपघाताशी संबंधित प्रकरणात कठोर कारवाई करण्याचे निर्देश दिले आहेत. या अपघातात दोन जणांचा मृत्यू झाला होता.
अधिकाऱ्यांच्या म्हणण्यानुसार, अपघात घडवणारी पोर्श कार 17 वर्षीय किशोरवयीन तरुणाने चालवली होती. कल्याणीनगरमध्ये रविवारी पहाटे मोटारसायकलवरून जाणाऱ्या दोघांना कारने धडक दिली, परिणामी त्यांचा मृत्यू झाला. घटनेच्या वेळी तरुण दारूच्या नशेत होता, असा पोलिसांचा दावा आहे. कार अपघातात सहभागी असलेल्या मुलाच्या वडिलांना पोलिसांनी ताब्यात घेतले असून एका अल्पवयीन मुलाला दारू दिल्याप्रकरणी दोन हॉटेलच्या तीन कर्मचाऱ्यांना अटक केली आहे. मुलाचे वडील ‘रिअल इस्टेट’ व्यावसायिक आहेत.
काय प्रकरण आहे?
रविवारी पहाटे 3.15 च्या सुमारास काही मित्र पार्टी करून मोटारसायकलवरून परतत होते. त्यानंतर भरधाव वेगाने येणाऱ्या एका पोर्श कारने कल्याणीनगर चौकात एका मोटारसायकलला धडक दिली. यात मोटारसायकलवरील अनीस आवडिया आणि अश्विनी कोस्टा यांचा मृत्यू झाला. दोघे 24 वर्षांचे होते. ते आयटी प्रोफेशनल होते आणि मूळचे मध्य प्रदेशचे होते. भारतीय दंड संहितेच्या कलम 304 आणि मोटार वाहन कायद्याच्या संबंधित कलमांनुसार किशोरवयीन मुलांविरुद्ध एफआयआर नोंदवण्यात आला आहे.
