लोणी काळभोर : घरी पायी जात असताना महिलेच्या गळ्यातील सोन्याचे गंठन दोन अज्ञात चोरट्यांनी हिसकावून दुचाकीवरून धूम ठोकली. ही घटना उरुळी देवाची (ता. हवेली) ग्रामपंचायत हद्दीतील जुना पालखी रस्त्यावरील कार्तिकेय जनरल स्टोअरसमोर रविवारी (ता.१७) सायंकाळी पाचच्या सुमारास घडली.
लोणी काळभोर पोलिसांनी दिलेल्या माहितीनुसार, फिर्यादी या जुना पालखी रस्त्यावरून चालल्या होत्या. तेव्हा दुचाकीवरून आलेल्या दोघांनी फिर्यादी यांच्या गळ्यातील सुमारे ४५ हजार रुपये किंमतीचे सोन्याचे गंठण हिसकावून पळ काढला. तेव्हा फिर्यादी यांनी चोरट्यांचा पाठलाग केला. मात्र, चोरट्यांनी दुचाकीवरून धूम ठोकली.
याप्रकरणी ३० वर्षीय महिलेने लोणी काळभोर पोलीस ठाण्यात फिर्याद दिली. त्यानुसार, पोलिसांनी दोन अज्ञात चोरट्यांच्या विरोधात गुन्हा दाखल केला. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक शशिकांत चव्हाण यांच्या मार्गदर्शनाखाली पोलीस उपनिरीक्षक रत्नदीप बिराजदार करत आहेत.
