शिक्रापूर : एका बिअरशॉपीचे शटर ड्रायडे पूर्वी चोरट्यांनी उचकटून बिअरशॉपीतील तब्बल २० बिअरच्या बॉक्ससह रोख रक्कम चोरून नेली. ही घटना शिरुर (ता. शिरुर) येथील पाषाण मळा भागात घडली. याबाबत सचिन कारभारी घावटे (वय ४४ रा. घावटे मळा, रामलिंग शिरुर ता. शिरुर जि. पुणे) यांनी शिरुर पोलीस स्टेशन येथे फिर्याद दिल्याने पुलिसांनी अज्ञात चोरट्यांवर गुन्हा दाखल केला आहे.
घावटे यांची साक्षी बिअर शॉपी नावाने बिअरशॉपी असून घावटे हे रात्रीच्या सुमारास बिअरशॉपी बंद करुन गेले होते. दुसऱ्या दिवशी सकाळच्या सुमारास शेजारील नागरिक कामाला चाललेले असताना घावटे यांच्या बिअर शॉपीचे शटर उचकटल्याचे दिसून आल्याने त्यांनी याबाबतची माहिती सचिन घावटे यांना दिली. त्यानंतर घावटे यांनी बिअरशॉपीमध्ये जाऊन पाहणी केली असता वेगवेगळ्या कंपनीचे २० बिअरच्या बॉक्ससह रोख रक्कम चोरीला गेल्याचे दिसून आले.
