पुणे : दुचाकीवर आलेल्या दोन चोरट्यांनी एका महिलेच्या गळ्यातील दागिने चोरण्याचा प्रयत्न केला. मात्र, महिलेच्या गळ्यात ओढणी असल्यामुळे चोरट्यांना दागिने पळवण्यात अपयश आले. ही घटना जुन्नर तालुक्यातील नारायणगाव शहरात मते बेकरीसमोर घडली. ही घटना सीसीटीव्हीमध्ये कैद झाली आहे. त्यानुसार पोलीस आरोपींचा शोध घेत आहेत.
पोलिसांनी दिलेल्या माहितीनुसार, बुधवारी (ता. २७) चार वाजण्याच्या सुमारास एक महिला जुन्नर रस्त्याने जात असताना मोटरसायकलवरून समोरून येणाऱ्या दोन चोरट्यांनी महिलेच्या गळ्यातील दागिने चोरण्याचा प्रयत्न केला. या महिलेच्या गळ्यात ओढणी असल्यामुळे चोरट्यांना दागिने पळवण्यात अपयश आले.
ज्येष्ठ महिला, युवती यांच्या गळ्यातील दागिने मोटरसायकलवर येऊन पळवून नेण्याचे प्रकार वाढल्याने नागरिकांमध्ये घबराट पसरली आहे. असाच प्रकार जुन्नर शहरातील कल्याण पेठ येथे शुक्रवारी (ता. २९) घडला. या पार्श्वभूमीवर सर्वांनी दागिने घालताना पुरेशी काळजी घेण्याचे आवाहन पोलिसांनी केले आहे.
