आळंदी : आळंदीमध्ये इंद्रायणी नदीत एका महिला पोलिसाने उडी मारून आत्महत्या केल्याची घटना घडली होती. ही घटना रविवारी (दि. 25) सायंकाळी सव्वा पाच वाजण्याच्या सुमारास घडली. त्यानंतर वेगवेगळ्या शोध पथकांकडून इंद्रायणी नदीत शोध मोहीम राबविण्यात आली. अखेर चार दिवसानंतर अखेर बुधवारी (दि. २८) पोलीस महिलेचा मृतदेह गोलेगाव येथे सापडला आहे. अनुष्का सुहास केदार (वय-20 वर्षे, रा. लक्ष्मीनारायण नगर, दिघी) असे या पोलीस महिलेचे नाव आहे.
पोलिसांनी दिलेल्या माहितीनुसार, अनुष्का केदार या पुणे ग्रामीण पोलीस दलात कार्यरत होत्या. त्या सध्या पुणे ग्रामीण मुख्यालय येथे नेमणुकीस होत्या. त्यांनी रविवारी सायंकाळी सव्वा पाच वाजण्याच्या सुमारास इंद्रायणी नदीच्या नवीन पुलावरून नदीत उडी मारली. त्यानंतर आळंदी पोलिसांनी घटनास्थळी धाव घेत अग्निशमन विभागाला पाचारण केले. दरम्यान, आळंदी पोलीस, आळंदी अग्निशमन विभाग, एनडीआरएफ यांच्या पथकाकडून इंद्रायणी नदीत शोधकार्य केले. अखेर बुधवारी पोलीस महिलेचा मृतदेह गोलेगाव येथे आढळला.
नदीत उडी मारण्यापूर्वी मित्राला फोन
अनुष्का केदार यांनी नदीत उडी मारण्यापूर्वी देहूफाटा आळंदी येथे राहणाऱ्या त्यांच्या एका मित्राला फोन केला असल्याची माहिती पोलिसांना मिळाली आहे. मात्र, हे टोकाचे पाऊल उचलण्याचे कारण अद्यापही गुलदस्त्यात आहे. मी इंद्रायणी नदीत उडी मारणार असल्याचे त्यांनी फोनवर म्हटले असल्याची माहिती मिळत आहे. त्यानुसार पोलिसांनी मित्राची चौकशी सुरु केली आहे.
