वेळू येथे भीषण अपघात! दोन कंटेनर, पीकअप व तीन दुचाकींची जोरदार धडक; दोघांचा मृत्यू, एकजण जखमी

महेंद्र शिंदे

खेड शिवापूर, ता. ३०: पुणे-सातारा महामार्गावरील वेळू येथील डब्ल्यूओएम कंपनीसमोर बुधवारी सकाळी सुमारे नऊ वाजता मोठा अपघात झाला. या विचित्र अपघातात दोन कंटेनर, एक पीकअप आणि तीन दुचाकींचा समावेश असून दोन जणांचा मृत्यू झाला असून यापैकी एकाची प्रकृती गंभीर असल्याचे समजते. दरम्यान, डब्ल्यूओएम कंपनीच्या सुरक्षा व सिफ्टी विभागाने तातडीने त्यांची रुग्णवाहिका पाठवून जखमींना खासगी रुग्णालयात उपचारासाठी दाखल केले.

मृतांमध्ये प्रथमेश महादेव रेडेकर (32, रा. सांगली) आणि दिव्यम सुनिल निकम (31, रा. धुळे) यांचा समावेश आहे. गंभीर जखमी पिकअप चालकाची ओळख संजय श्रीरंग खाटपे (42, रा. हिंगेवाठार, ता. भोर) अशी आहे.मिळालेल्या माहितीनुसार, साताऱ्याकडून पुण्याकडे जाणारा एक कंटेनर ससेवाडी उड्डाण पुलावर आला असता, चालकाचे वाहनावरील नियंत्रण सुटले. यामुळे कंटेनर विरुद्ध लेनमध्ये म्हणजेच पुणेहून साताऱ्याकडे जाणाऱ्या मार्गावर जाऊन आदळला. या अनियंत्रित कंटेनरने पुढील एक कंटेनर, एक पीकअप आणि तीन दुचाकींना जोरदार धडक दिली.

विशेष बाब म्हणजे, अपघात घडून सुमारे अर्धा तास उलटल्यानंतरही राजगड पोलीस आणि महामार्ग पोलीस घटनास्थळी दाखल झाले नव्हते. त्यामुळे उपस्थित नागरिकांनी तीव्र संताप व्यक्त केला. पोलिसांच्या या दिरंगाईबाबत नागरिकांनी नाराजी व्यक्त केली. या अपघातामुळे पुणे-सातारा महामार्गावर मोठ्या प्रमाणावर वाहतूक कोंडी झाली होती. काही वेळ वाहतूक ठप्प झाली होती, मात्र नंतर वाहतूक हळूहळू सुरळीत करण्यात आली आहे.