पुणे (Pune) : स्वारगेट-कात्रज या नियोजित मेट्रो मार्गावर सुरुवातीला पद्मावती आणि बिबवेवाडी या दोन स्थानकांचा समावेश नव्हता. नंतर ते दोन स्थानक वाढविण्यात आले आहे. त्यामुळे या दोन स्थानकांचे वाढीव खर्च ६८३ कोटी रुपये राज्य सरकार करणार आहे.
विधानसभा निवडणूकपूर्वी स्वारगेट-कात्रज या भूमिगत मेट्रो मार्गाचे पंतप्रधान नरेंद्र मोदी यांच्या हस्ते उद्घाटन झाले. परंतु, काम मात्र सुरु झाले नव्हते. आता, महामेट्रोकडून निविदा काढण्यात आली आहे. त्यामुळे या कामाला येत्या तीन-चार महिन्यांत सुरुवात होणार आहे.
महामेट्रोकडून नियोजित स्वारगेट-कात्रज या भूमिगत मेट्रो मार्गासाठी चार महिन्यांपूर्वी निविदा काढण्यात आल्या होत्या, परंतु, यामध्ये पद्मावती आणि बिबवेवाडी या दोन स्थानकांचा समावेश नव्हता. यामुळे या परिसरातील नागरिकांनी विरोध केल्यावर पालकमंत्री अजित पवार यांनी पुन्हा दोन स्थानके वाढविण्याची सूचना केली. त्यांनतर आता पुन्हा नव्याने निविदा काढण्यात आले असून, याला ४० दिवसांची मुदत देण्यात आली आहे.
या काळात आलेल्या निविदांची छाननी केल्यानंतर काम सुरु होणार असून, याला तीन-चार महिने लागणार आहेत. त्यानंतर चार वर्षांत हे काम पूर्ण करण्याचे नियोजन असून, २०२९ मध्ये हे काम पूर्ण होईल.
स्वारगेट-कात्रज मार्ग
एकूण अंतर: ५.४६ किमी
एकूण खर्च : ३,६४७
वाढीव खर्च : ६८३
कामाचा कालावधी : ४ वर्ष
एकूण स्थानके : ५
