पुणे : कोथरूड गोळीबार प्रकरणातील मुख्य आरोपी निलेश घायवळ परदेशात पळून गेल्यानंतर पुणे (Pune News) पोलिसांनी घायवळ याच्यासह त्याच्या साथीदारांविरुद्ध मोक्काअंतर्गत कारवाई सुरु केली आहे. या कारवाई दरम्यान, निलेश घायवळ याचा सख्खा भाऊ सचिन बन्सीलाल घायवळ याला प्रत्यक्ष गृहराज्यमंत्री योगेश कदम यांच्या स्वाक्षरीने शस्त्र परवाना मंजूर करण्यात आला असल्याचे दस्तऐवज समोर आले. हे दस्तऐवज समोर आल्यानंतर राजकीय वर्तुळातून योगेश कदम यांच्यावर टीका होण्यास सुरु झाली. याचदरम्यान, योगेश कदम यांनी यावर स्पष्टीकरण देताना, सुनावणीच्या दिवशीपर्यंत बन्सीलाल घायवळ विरोधात कोणतेही गुन्हे प्रलंबित नव्हते, असं म्हणत आपली बाजू मांडण्याचा प्रयत्न केला.
दुसरीकडे मात्र, उद्धव ठाकरे गटाच्या नेत्या सुषमा अंधारे यांनी योगेश कदम यांच्यावर गंभीर आरोप करत धक्कादायक पुरावे सादर केले आहेत. सुषमा अंधारे यांनी एक्सवर पोस्ट करत म्हटले आहे की, ‘काल कुख्यात गुंड निलेश घायवळ चा भाऊ सचिन बन्सीलाल घायवळ शस्त्र परवाना प्रकरणांमध्ये गृहराज्यमंत्री योगेश कदम म्हणाले की, शस्त्रपरवाना देत असताना कुठलाही गुन्हा दाखल नव्हता. पण सचिन घायवळ याच्यावर फक्त खुनाचा गुन्हा नाही तर मोक्का अंतर्गत सुद्धा गुन्हे दाखल होते. विशेष अशा व्यक्तीला शस्त्र परवाना दिला जाऊ नये असा पोलिसांचा अहवाल होता. तरीसुद्धा योगेश कदम यांनी स्वतःच्या अधिकार कक्षेमध्ये हा विशेष परवाना देऊ केला.
योगेश कदम यांनी आपल्या अधिकारांचा गैरवापर करत एका गुंडाला अभय देण्याचा आणि त्याला बळ पुरवण्याचा प्रयत्न केला आहे. सबब योगेश कदम तुम्हाला पदावर राहण्याचा अधिकार नाही तात्काळ गृहराज्यमंत्री पदाचा राजीनामा द्या. अशी मागणी सुषमा अंधारे यांनी केली आहे. यावेळी त्यांनी मुख्यमंत्री देवेंद्र फडणवीस यांना ट्विट पोस्टवर टॅग देखील केले आहे.
