पुणे : बारामती लोकसभा मतदारसंघातील यवत रेल्वे स्थानकावर दोन्ही फलाटांवर मालगाड्या उभ्या केल्यामुळे नागरिकांना जीव मुठीत धरून रुळ ओलांडावा लागल्याचा प्रकार समोर आला आहे. या प्रकारामुळे महिला, वृद्ध आणि लहान मुले मालगाडीला वळसा घालून येईपर्यंत मेटाकुटीला आली होती. त्यानंतर अधिकाऱ्यांनीदेखील उडवा उडवीची उत्तर दिल्याचंही समोर आलं आहे. बारामती लोकसभेच्या खासदार सुप्रिया सुळे यांनी एक व्हिडीओ ट्विट केला आहे.
मागील अनेक वर्षांपासून बारामतीतील विविध प्रश्नांसंबंधात त्या ट्विट करत प्रश्न उपस्थित करत असतात. मतदारसंघात कोणत्याही परिसरात त्यांना कोणताही चुकीचा प्रकार दिसला की त्या थेट ट्विट करुन संबंधित मंत्र्यांना सुचना देतात किंवा मदत मागत असतात. आतापर्यंत अनेकदा त्यांनी असे व्हिडीओ फोटो ट्विट केले आहेत. अशातच आता पुन्हा एकदा एक व्हिडीओ ट्विट करत केंद्रीय रेल्वेमंत्री आश्विनीजी वैष्णव यांना विनंती केली आहे.
नेमकं काय घडलं?
सुप्रिया सुळेंनी एक व्हिडीओ ट्विट करत मजकूर लिहिला आहे की, बारामती लोकसभा मतदारसंघातील यवत रेल्वे स्थानकाच्या दोन्ही फलाटांवर मालगाड्या उभ्या असल्यामुळे प्रवाशांना अक्षरशः जीवावर उदार होत रुळ ओलांडून फलाटावर यावे लागले. हा प्रसंग रात्री घडला, त्यामुळे महिला, वृद्ध आणि लहान मुले मालगाडीला वळसा घालून येईपर्यंत मेटाकुटीला आली होती. रेल्वे ड्राईव्हरची ड्युटी संपली म्हणून तो फलाटावरच गाडी लावून गेला असे बेजबाबदार उत्तर रेल्वेच्या अधिकाऱ्यांकडून देण्यात आले. रेल्वेच्या प्रवाशांच्या सुरक्षेची संपूर्ण जबाबदारी रेल्वे प्रशासनाची आहे. परंतु तरीही अशा पद्धतीच्या घटना घडणे हे चुकीचे आहे. केंद्रीय रेल्वेमंत्री आश्विनीजी वैष्णव यांना विनंती आहे की, या प्रकरणाची चौकशी करुन अशा प्रकारच्या घटना पुन्हा होऊ नये याबाबतच्या सुचना संबंधितांना द्याव्या, असंही त्या म्हणाल्या आहेत.
Pune Railway Division’s management failures have led to alarming conditions for travelers. Train 01531 (Pune-Baramati DEMU) was halted on the Mainline because Goods Trains took over both platforms at Yawat Station, compelling passengers, including the elderly, women, and… pic.twitter.com/PhuOe7KD3n
— Supriya Sule (@supriya_sule) March 5, 2024
