मुंबई: काही महिन्यांपूर्वी राष्ट्रवादी काँग्रेस पक्षात उभी फूट पडली आहे. शरद पवार गट आणि अजित पवार गट असे दोन गट राष्ट्रवादीमध्ये पडले आहेत. अजित पवार यांनी भारतीय जनता पक्षासोबत जात उपमुख्यमंत्री म्हणून शपथ घेतली. प्रफुल पटेल, छगन भुजबळ, सुनील तटकरे, दिलीप वळसे पाटील यांच्यासह दिग्गज नेते अजित पवारांसह गेले आहेत. आता लोकसभेच्या निवडणुका तोंडावर आल्या आहेत. अशातच मुंबईत मंत्रालयाबाहेर लागलेल्या एका बॅनरची जोरदार चर्चा सुरु झाली आहे.
शरद पवार गटाच्या खासदार सुप्रिया सुळे यांना धोबीपछाड देण्यासाठी अजित पवार गट सुनेत्रा पवारांना लोकसभा निवडणुकीच्या रिंगणात उतरवणार असल्याची चर्चा सुरु झाली आहे. याचे महत्त्वाचं कारण म्हणजे मंत्रालयाबाहेर लागलेला बॅनर. या बॅनरमध्ये ‘सुनेत्रा पवार बारामतीच्या भावी खासदार’ असा उल्लेख करण्यात आला आहे. मंत्रालयाच्या समोर असलेल्या राष्ट्रवादीच्या कार्यालयाबाहेर बॅनर लागल्याने चर्चांना एकच उधाण आलं आहे. बारामती हा खासदार सुप्रिया सुळेंचा लोकसभा मतदार संघ आहे. त्या मतदारसंघातून सुनेत्रा पवारांना उभं करण्याचा विचार अजित पवार गटाने पक्का केलेला दिसतो आहे. या बॅनरनंतर चर्चा आता सुरु झाल्या आहेत.
तत्पूर्वी अजित पवार गटाने काही दिवसांपूर्वी कर्जतमध्ये चिंतन शिबीर आयोजित केलं होतं. या शिबिरात अजित पवार यांनी एक भाष्य केलं होतं. सातारा, शिरुर, रायगड आणि बारातमी या चार लोकसभा मतदारसंघांमध्ये राष्ट्रवादी अजित पवार गटाचा उमेदवार लढणार असल्याचं सांगितले. त्यानंतर दोनच दिवसात हा बॅनर लागला आहे.
