पुणे : गंभीर गुन्ह्यात सराईतासह साथीदारांविरुद्ध न्यायालयात वेळेत दोषारोपपत्र दाखल न झाल्याने आरोपींना जामीन मिळाला. या कारणावरून वरिष्ठांनी सहायक आयुक्तांची कानउघाडणी केली. त्यामुळे पुणे शहर पोलीस दलातील एका सहायक आयुक्तांनी इमारतीतील सदनिकेच्या गॅलरीतून उडी मारून आत्महत्येचा प्रयत्न केल्याची चर्चा पोलीस दलात दबक्या आवाजात सुरू आहे. मात्र, असे काही घडले नसून, गॅलरीत पाय घसरून अपघात झाल्याची माहिती वरिष्ठ अधिकाऱ्यांनी दिली आहे.
याबाबत मिळालेल्या अधिक माहितीनुसार, टोळीयुद्धातून शहराच्या मध्यभागात तीन महिन्यांपूर्वी एका तरुणाचा खून झाला होता. या गुन्ह्यात सराईतासह साथीदारांविरुद्ध न्यायालयात वेळेत दोषारोपपत्र दाखल करण्यात आले नव्हते. परिमंडळ एकमधील एका सहायक पोलीस आयुक्तांकडे गंभीर गुन्ह्याचा तपास सोपविण्यात आला होता. दोषारोपपत्र वेळेत दाखल न झाल्याने सराईतासह साथीदारांना जामीन मंजूर करण्यात आला होता. हा प्रकार घडल्यानंतर संबंधित सहायक आयुक्तांची वरिष्ठ अधिकाऱ्यांनी कानउघाडणी केली.
दरम्यान, सहायक आयुक्त सोमवारी गॅलरीतून तोल जाऊन पडल्याची माहिती रुग्णालय प्रशासनाने स्थानिक पोलीस ठाण्यात दिली. त्यानंतर पोलिसांनी वरिष्ठ अधिकाऱ्यांना या घटनेची माहिती दिली. शहर पोलीस दलातील वरिष्ठ अधिकारी, दोन पोलीस उपायुक्त, सहायक पोलीस आयुक्तांनी रुग्णालयात धाव घेतली. उपचारासाठी दाखल झालेल्या सहायक आयुक्तांची वरिष्ठ अधिकाऱ्यांनी रुग्णालयात भेट घेतली. अधिकाऱ्याला धीर देऊन वरिष्ठ अधिकाऱ्यांनी या प्रकाराची कोठेही वाच्यता करू नका, असे सहायक आयुक्तांना सांगितले. सहायक आयुक्त गॅलरीत पाय घसरल्याने पडले असून, त्यांच्या पायाला दुखापत झाल्याचे वरिष्ठ अधिकाऱ्यांनी सांगितले.
दरम्यान, वरिष्ठ अधिकाऱ्यांनी सहायक आयुक्तांची कानउघाडणी केल्यामुळे सहायक आयुक्त मानसिक तणावाखाली होते. त्यातूनच त्यांनी आत्महत्येचा प्रयत्न केल्याची चर्चा शहर पोलीस दलात सुरू झाली. वरिष्ठ अधिकाऱ्यांनी सहायक आयुक्त गॅलरीत पाय घसरुन पडल्याचे सांगून प्रकरण शांत केले.
