दीपक खिलारे
इंदापूर : चालु गळीत हंगामामध्ये शेतकऱ्यांना बिले मिळण्यास थोडा विलंब झाला असला तरी लवकरच ऊस बिले अदा केली जातील. इंदापूरच्या आमदारांनी अध्यक्षपद सांभाळलेला छत्रपती साखर कारखान्याला अडचणीत आणण्यास जबाबदार कोण ? याचे आत्मपरीक्षण त्यांनी स्वतः करावे. तसेच इंदापूर तालुक्यामध्ये आमदारांनी एखादी तरी सहकारी संस्था उभी करावी व मगच इतरांच्या सहकारी संस्थांवर आरोप करावेत, असे प्रत्युत्तर निरा भिमा सहकारी साखर कारखान्याचे अध्यक्ष लालासाहेब पवार यांनी सोमवारी दिले.
आमदार दत्तात्रय भरणे यांनी नीरा भीमा कारखान्यावर टीका केली होती, त्यास अध्यक्ष लालासाहेब पवार यांनी प्रत्युत्तर दिले.
ज्यांनी आयुष्यभरात एकही सहकारी संस्था काढली नाही, त्यांना विविध सहकारी संस्थांचे जाळे उभे करताना व त्या यशस्वीपणे चालविताना किती कष्ट व वेळ द्यावा लागतो, त्रास सहन करावा लागतो, याची जाणीव काय असणार? असा माजी राज्यमंत्र्यांना सवाल करून लालासाहेब पवार पुढे म्हणाले, कोणतीही सहकारी संस्था चालविताना तात्पुरता चढ-उतार येत असतो.
कारखान्याचे संस्थापक व माजी मंत्री हर्षवर्धन पाटील यांचे नेतृत्वाखाली नीरा भीमा कारखान्याने गेली २२ वर्षांमध्ये शेतकऱ्यांचा विश्वास संपादन केला आहे. या विश्वासाच्या जोरावरच कारखान्याची यशस्वीपणे वाटचाल सुरू आहे.
निरा भिमामुळे या परिसराचा विकास झाला असून, हजारो संसार हे नीरा भीमा कारखान्यामुळे उभे राहिले आहेत, असे लालासाहेब पवार यांनी स्पष्ट केले. एखाद्या संस्थेवर टीका करणे अतिशय सोपे असते, मात्र ती संस्था उभी करण्यासाठी अनेक वर्षे कष्ट घ्यावे लागतात, याची जाणीव टीका करणाऱ्यांनी ठेवावी, असे त्यांनी नमूद केले.
छत्रपती कारखाना हा राज्यातील जुना कारखाना असून घोलप, चोपडे, निंबाळकर यांच्या अध्यक्षपदाच्या काळात राज्यात भरभराटीस आला होता. या कारखान्याचा आदर्श घेऊन राज्यात अनेक कारखाने उभे राहिले. असा हा आदर्श असलेला कारखाना मात्र माजी राज्यमंत्री हे कारखान्याचे अध्यक्ष झाल्यापासून अडचणीत आला आहे.
सध्या राज्यमंत्री कामकाज पाहत असलेला छत्रपती अडचणीत आल्याने, त्यांना इतर कारखान्यावर बोलण्याचा अधिकार नाही, असे लालासाहेब पवार यांनी स्पष्ट केले.
आमदार भरणे यांच्या छत्रपती साखर कारखान्यापेक्षा निरा भिमा साखर कारखान्याने नेहमीच अधिकचा भाव दिला आहे. तसेच गेल्या २०२१-२२ च्या गळीत हंगामामध्ये निरा भीमाने ऊसाची वेळेवरती व शेतकऱ्यांना इतर त्रास न होता तोडणी करून जास्त दर दिला आहे. त्यामुळे भरणे यांनी स्वतःच्या छत्रपती कारखान्याकडे अधिक लक्ष दिले तर बरे होईल, असा टोला अध्यक्ष लालासाहेब पवार यांनी लगावला.
निरा भिमा कारखाना सध्या हर्षवर्धन पाटील यांचे नेतृत्वाखाली मजबुतीने उभा असून, चालू २०२२-२३ च्या २२ व्या गळीत हंगामामध्ये कारखान्याने आज सोमवार अखेर ५ लाख ६० हजार मे. टन ऊसाचे गाळप पूर्ण केले असून उपपदार्थ निर्मितीचे सर्व प्रकल्प पुर्ण क्षमतेने सुरु आहेत, अशी माहितीही अध्यक्ष लालासाहेब पवार यांनी दिली.
यावेळी उपाध्यक्ष कांतीलाल झगडे, विलासराव वाघमोडे, उदयसिंह पाटील, राजवर्धन पाटील, ॲड. कृष्णाजी यादव, दत्तात्रय शिर्के, दत्तू सवासे, प्रतापराव पाटील, हरिदास घोगरे, दादासो घोगरे, संजय बोडके, प्रकाश मोहिते, मच्छिंद्र वीर, बबनराव देवकर, भागवत गोरे, चंद्रकांत भोसले, सुभाष पोळ, कमाल जमादार उपस्थित होते.
