पुणे : दहावी, बारावीची परीक्षा यंदा फेब्रुवारी आणि मार्च महिन्यात होत आहे. परीक्षा मंडळाकडून तयारी अंतिम टप्प्यात आली आहे. याच दरम्यान समोर आलेल्या परीक्षेसंदर्भातील आकडेवारीमुळे परीक्षा मंडळाने आश्चर्य व्यक्त केले आहे. दहावी आणि बारावीच्या विद्यार्थ्यांची संख्या दर वर्षीच्या तुलनेत वाढल्याचे दिसून येत आहे. अचानक विद्यार्थी संख्या कशी वाढली, या संदर्भात आता मंडळ चौकशी करणार आहे.
बारावीची परीक्षा आता २१ फेब्रुवारीपासून सुरु होत आहे. ही परीक्षा १९ मार्चपर्यंत चालणार आहे. दहावीची परीक्षा १ ते २६ मार्च दरम्यान होत आहे. या परीक्षेसाठी विद्यार्थ्यांचे अर्ज भरण्यात आले. त्यासाठी अर्ज भरण्याची प्रक्रिया ऑक्टोबरमध्ये सुरू केली होती. मागील वर्षी दहावीसाठी १५ लाख ६१ हजार विद्यार्थ्यांनी अर्ज भरले तर बारावी परीक्षेसाठी १४ लाख २८ हजार विद्यार्थ्यांनी अर्ज भरले होते. परंतु यंदा त्यात वाढ झाली आहे.
दहावीची विद्यार्थी संख्या १६ लाख १० हजार झाली आहे. तर बारावीची संख्या १५ लाख १५ हजार झाली आहे. दहावी आणि बारावीच्या विद्यार्थ्यांची संख्या दर वर्षीच्या तुलनेत वाढल्याचे दिसून येत आहे. यामागे अन्य काही विशेष कारणे आहेत का, याची चौकशी मंडळ करणार आहे. दहावीचे सुमारे २५ हजार विद्यार्थी यंदा वाढले आहेत. ते का वाढले, याचा अभ्यास करण्यात येणार आहे.
अतिविलंब शुल्कासह अर्ज भरण्यासाठी आणखी मुदत आहे. यामुळे या विद्यार्थिसंख्येत आणखी वाढ होणार आहे. दरम्यान, दहावी, बारावीची परीक्षा काही दिवसांवर आली असताना राज्यभरातील शिक्षण संस्थाचालक पुन्हा आंदोलनाच्या तयारीत आहेत. दहावी बारावीच्या परीक्षांवर बहिष्कार टाकण्याची तयारी त्यांनी सुरु केली आहे. शासनाकडे रखडलेले शेकडो कोटींचे शिक्षकेतर अनुदान ही त्यांची प्रमुख मागणी आहे.
