लोणी काळभोर : जिल्हास्तरीय खो-खो स्पर्धेत लोणी काळभोर (ता. हवेली) येथील पृथ्वीराज कपूर मेमोरियल हायस्कूल व ज्युनियर कॉलेजच्या मोठ्या गटातील विद्यार्थ्यांनी आपला दबदबा कायम ठेवला आहे. यावर्षीही सुवर्ण कामगिरी करून सलग दुसऱ्यांदा अजिंक्य पद पटकाविण्याचा बहुमान मिळविला आहे. विजेत्या खेळाडूंचे व शाळेचे लोणी काळभोर व परिसरातील नागरिकांकडून भरभरून कौतुक होत आहे.
महाराष्ट्र राज्य क्रीडा व युवक सेवा संचालनालय व पुणे जिल्हा क्रीडा अधिकारी कार्यालयाच्या संयुक्त विद्यमाने जिल्हास्तरीय खो खो स्पर्धा भोसे (ता. खेड) येथील मॉडर्न हायस्कूल व ज्युनियर कॉलेजमध्ये सोमवारी (ता. 30 सप्टेंबर) पार पडली. प्रत्येक तालुक्यातून एक विजयी संघ याप्रमाणे 17 वर्ष वयोगटाचे 12 संघ व 19 वर्षे वयोगटाचे 12 संघ सहभागी झाले होते. या स्पर्धेत पृथ्वीराज कपूर मेमोरियल हायस्कूलच्या 14, 17 व 19 वर्षे वयोगटातील मुलांच्या संघाने सहभाग घेतला होता. 17 व 19 वर्ष वयोगटातील मुलांच्या स्पर्धा दिवस रात्र पद्धतीने खेळविण्यात आल्या.
या स्पर्धेत पृथ्वीराज कपूर मेमोरियल हायस्कूल व ज्युनियर कॉलेजच्या 17 वर्ष वयोगटाच्या मुलांचा अंतिम सामना शिरूर संघाबरोबर झाला. हा सामना विद्यालयाने 3 गुणांनी जिंकला. 17 वर्ष वयोगटाच्या मुलांचा संघ सोलापूर येथे होणाऱ्या विभागीय स्पर्धेसाठी पात्र ठरला आहे. तर 19 वर्ष वयोगटास चतुर्थ क्रमांक मिळाला.
दरम्यान, विजेत्या संघातील खेळाडू व क्रीडा शिक्षक सुरेश कोरे व राजेश चौरे या दोघांचा विद्यालयाच्या वतीने प्राचार्य सीताराम गवळी यांनी शुभेच्छा देऊन सत्कार केला. तसेच पुढील वाटचालीसाठी शुभेच्छा दिल्या. या वेळी पर्यवेक्षक विलास शिंदे, नरसिंह जाधवर, ज्येष्ठ शिक्षिका शर्मिला साळुंखे, कल्पना बोरकर, शशीराव शेंडगे, माजी राष्ट्रीय खेळाडू अभिजीत खेडेकर, काजल खेडेकर, राम विरकर, प्रणव विरकर, विद्यालयाचे शिक्षक, शिक्षकेतर कर्मचारी, विद्यार्थी व ग्रामस्थ मोठ्या संख्येने उपस्थित होते.
विजेते खेळाडू व क्रीडा शिक्षकांचे कौतुक
जिल्हास्तरीय खो-खो स्पर्धेत 17 वर्षे वयोगटात पृथ्वीराज कपूर मेमोरियल हायस्कूल व ज्युनियर कॉलेजच्या खेळाडूंनी प्रथम क्रमाक पटकाविला आहे. त्यामुळे लोणी काळभोरच्या शिरपेचात अजून एक मानाचा तुरा रोवला गेला आहे. त्यामुळे विजेते खेळाडू व क्रीडा शिक्षकांवर लोणी काळभोर व परिसरातील नागरिकांकडून कौतुकाचा वर्षाव होत आहे.
विजेत्या खेळाडूंची नावे पुढीलप्रमाणे :
रोहन खामकर, सोहम खामकर, रेहान सय्यद, प्रशांत खरात, प्रणय शेंडगे, ऋषिकेश साळुंखे, आर्यन हालमे, रोहन होवाळ, प्रतीक कोरपे, अरमान कोरबू, कार्तिक खोचरे, गोविंद भाग्यवंत, अभिषेक कोळी, सोहेब मटके, सुमित मोरे.
