लोणी काळभोर: राज्यभरात आज सोमवारपासून (ता. 16) सर्वत्र शाळा सुरू झाल्या आहेत. शाळेची गुणवत्ता वृद्धींगत करण्यासाठी व मुलांची उपस्थिती वाढविण्याकरीता शालेय शिक्षण विभागामार्फत राज्यभर ‘शाळा प्रवेशोत्सव’ उपक्रम साजरा करण्यात आला. त्यानुसार विद्यार्थ्यांचे स्वागत धूमधडाक्यात करण्यात आले. मात्र शिक्षणाचे माहेरघर असलेल्या पुणे जिल्ह्यातील कुंजीरवाडी (ता.हवेली) येथील विद्यार्थ्यांना शाळेच्या पहिल्याच दिवशी चक्क पुणे-सोलापूर महामार्गालगत साठलेला कचरा उचलावा लागल्याचा धक्कादायक प्रकार उघडकीस आला आहे.
कुंजीरवाडी (ता.हवेली) ग्रामपंचायत हद्दीतील थेऊर फाटा येथील धुमाळ मळ्यात जिल्हा परिषद प्राथमिक शाळा आहे. या शाळेतील विद्यार्थ्यांना शिक्षकांनी कचरा गोळा करायला सांगितला होता. त्यानुसार विद्यार्थ्यांनी शाळेतील कचरा उचलून शाळा स्वच्छ व सुंदर बनवली होती. मात्र, शाळेच्या समोरूनच पुणे-सोलापूर राष्ट्रीय महामार्ग गेलेला आहे. या महामार्गालगत मोठ्या प्रमाणात कचरा साठला होता. शाळेसह सभोवतालचा परिसर स्वच्छ व्हावा म्हणून शिक्षकांनी विद्यार्थ्यांना हा कचरा भरून कचरा गाडीत टाकण्यास सांगितले होते.
दरम्यान, शाळेच्या समोर असलेल्या महामार्गालगतचा कचरा कुंजीरवाडी ग्रामपंचायतीच्या स्वच्छता विभागाच्या कर्मचाऱ्यांनी उचलणे अपेक्षित होते. परंतु, कर्मचाऱ्यांनी कामात हलगर्जीपणा केल्यामुळे हा कचरा उचलण्याची वेळ विद्यार्थ्यांवर आलेली आहे. विद्यार्थ्यांनी स्वत: हा कचरा भरून ट्रॅक्टरमध्ये टाकला आहे. आता ग्रामपंचायत प्रशासनाने याची गंभीर दखल घेणे अपेक्षित आहे.
कचरा गाडीत दुर्गंधीयुक्त कचरा असतो. विद्यार्थ्यांना कचरा टाकताना एखादा संसर्गजन्य रोग होऊन त्याचा फैलाव होऊ शकतो. फैलाव झाला तर शाळेतील सर्व विद्यार्थ्यांना रोगाची लागण होऊ शकते. त्यामुळे कुंजीरवाडी ग्रामपंचायत प्रशासनाने पुणे-सोलापूर राष्ट्रीय महामार्गालगतचा कचरा उचलावा. तसेच कचरा उचलण्यास हलगर्जी करणाऱ्या संबंधित कर्मचाऱ्यांवर कारवाई करावी, अशी मागणी नागरिकांकडून जोर धरू आहे.
