शुभम वाकचौरे
जांबूत : जुन्नर व आंबेगाव तालुक्यातील कुकडी प्रकल्पांतर्गत असलेल्या नद्यांना पाणी न सोडता, पाटबंधारे विभागाने बेकायदेशीर कालव्यातून नगर जिल्ह्याला ३० दिवसांच्या आवर्तनातून पाणी सुरू केले आहे. येडगाव धरणाचे पाणी तत्काळ बंद करावे, अन्यथा जुन्नर शेतकरी संघटना आंदोलन करण्यासाठी रस्त्यावर उतरेल, असा इशारा शेतकरी संघटनेचे जुन्नर तालुका अध्यक्ष सचिन थोरवे यांनी दिला.
थोरवे म्हणाले की, राज्यात सध्या दुष्काळसदृश्य परिस्थिती आहे. धरण क्षेत्रात देखील अतिशय कमी पर्जन्यमान झाल्यामुळे पाणीसाठी मर्यादीत आहे. पुढे पाऊस होईल की नाही, याची शाश्वती नाही. येडगाव धरणामध्ये सध्या केवळ २७ टक्के इतका पाणीसाठा आहे. या धरणात अनेक वर्षांपासून गाळ साचलेला असल्यामुळे फक्त १६ ते १७ टक्के पाणीसाठा धरणात शिल्लक आहे.
या धरणातील पाणी कालव्याद्वारे नगर जिल्ह्यामध्ये सोडले जात आहे. पाण्याचा गैरवापर होत असल्याचे निदर्शनास येत आहे. हे पाणी बंद न झाल्यास, जुन्नर तालुक्यातील शेतकऱ्यांवर भविष्यात पाणीटंचाईचे संकट ओढवू शकते. येथील जनावरे चारा व पाणी न मिळाल्याने मृत पावू शकतात. या भागातील नद्या कोरड्या असताना हे बेकायदेशीर आवर्तन बंद करावे. भविष्यात पिण्याच्या पाण्यासाठी तरतूद ठेवावी, असे थोरवे यांनी स्पष्ट केले.
शेतकरी संघटनेचे जिल्हा संघटक अंबादास हांडे, तालुका अध्यक्ष संजय भुजबळ, तालुका संघटनेचे उपाध्यक्ष अजित वालझडे व अजित वाघ, युवा अध्यक्ष सचिन थोरवे, प्रमोद खांडगे, शिवनेरी शेतकरी संघटनेचे अध्यक्ष राजेंद्र ढोमसे यांनी पत्रकाद्वारे ही मागणी पाटबंधारे विभागाचे अधिकारी रावळे यांच्याकडे केली आहे.
पालकमंत्री आणि कालवा सल्लागार समितीची बैठक पुण्यातील सिंचन भवन येथे आहे. येथे हा विषय चर्चेला घेऊ. तोपर्यंत आपण हे आंदोलन स्थगित करावे, असे निवेदन शेतकरी संघटनेला दिले. त्यानंतर हे आंदोलन स्थगित करण्यात आले. परंतु पाणी बंद न केल्यास शेतकरी संघटना पुन्हा आक्रमक होऊन याठिकाणी आंदोलन करेल, असा इशारा तालुका अध्यक्ष संजय भुजबळ व युवा अध्यक्ष सचिन थोरवे यांनी दिला.
या वेळी जुन्नर पोलीस ठाण्याचे उपविभागीय अधिकारी रवींद्र चौधरी यांनीही आंदोलनकर्त्यांची भेट घेऊन त्यांची समस्या समजून घेतली. नारायणगाव पोलीस ठण्याचे प्रभारी पोलीस निरीक्षक महादेव शेलार यांनी बंदोबस्त ठेवला होता. उपस्थित सर्वांचे आभार संजय भुजबळ यांनी मानले.
