राहुलकुमार अवचट
यवत (पूणे) : प. पू. श्री. ज्ञानेश्वर हरी काटकर, प्रज्ञापुरी (कोल्हापूर) यांच्या प्रेरणेने व प. पू. श्री. गोविंद वासुदेव रानडे (गुरुजी), नामस्मरण कोल्हापूर यांच्या मार्गदर्शनात श्री साईबाबा पालखी सोहळा समिती कराड आयोजित श्री क्षेत्र शिर्डी ते कराड पायी पालखी सोहळ्याचे चौफुला येथील बोरमलनाथ मंदिर येथे मोठ्या उत्साहात स्वागत करण्यात आले.
सकाळी साईनाथ मंगल कार्यालय नागरगाव येथून निघालेली पालखी दुपारच्या विसाव्यासाठी बोरमलनाथ मंदिर येथे थांबली.
बोरमलनाथ मंदिर येथे पालखी स्वागतासाठी रांगोळी व फुलांच्या पायघड्या घालण्यात आल्या होत्या. श्री साईचरण सेवा मंडळ, यवत व साई ऑटो परिवार यांच्या वतीने पालखीचे स्वागत करण्यात आले. चौफुला शिरूर रस्त्यावरील बोरमलनाथ फाट्यापासून आकर्षक रांगोळी काढण्यात आली होती. तर बोरमलनाथ स्वागत कमानीपासून विविध फुलांच्या पायघड्या घालण्यात आल्या होत्या. पालखीचे मंदिराच्या प्रवेशद्वारावर आगमन होताच गुलाब पुष्पांचा वर्षाव करण्यात आला.
यावेळी पालखीला आकर्षक फुलांची सजावट करुन श्री साईंची माध्यांन्ह आरती करण्यात आली व महाप्रसाद वाटप करण्यात आलेदत्तजयंती उत्सव निमित्ताने पालखी सोहळा आयोजित केला जात असून, पालखीचे हे २३ वे वर्ष आहे. पालखी सोहळ्यात कराड, वाठार किरोली, मसुर, पेठ नाका, कोल्हापूर, सांगली येथील अनेक भक्त सहभागी झाल्याचे पालखी सोहळा प्रमुख उदयसिंह देसाई यांनी सांगितले.
आजचा पालखी सोहळा मुक्काम पूजा गार्डन सुपा येथे असून, निरा वॉटर स्टेशन कोरेगाव मसूर असा प्रवास करत २५ डिसेंबर रोजी पालखी सोहळा कराड येथे पोहोचणार असून, २६ रोजी सायंकाळी दत्त जयंती साजरी होऊन पालखी सोहळ्याची सांगता होणार असल्याचे आयोजकांनी सांगितले.
विशेष बाब म्हणजे पालखी सोहळा शिर्डीतून प्रस्थान केल्यानंतर एक श्वान अचानक पालखी बरोबर चालू लागले व गेल्या ८ दिवसापासून हे कोणतेही ओळखीची व्यक्ती नसताना देखील पालखी न सोडता रस्त्याने येताना देखील पालखी बरोबरच चालत आहे.
अखंड श्वासावर चालणारा असा “साई साई हरे हरे,साई राम हरे हरे ” हा जप करत पायी वारी करणारे भक्त कराड कडे मार्गस्थ झाले.यावेळी यवत, तांबेवडी , वरवंड चौफुला येथील साई भक्त परिवार व श्री साईचरण सेवा मंडळाचे सर्व सदस्य, परिसरातील असंख्य साईभक्त मोठ्या संख्येने उपस्थित होते.
