लोणी काळभोर : शिवजन्मोत्सवानिमित्त विद्यार्थ्यांच्या कलागुणांना वाव देण्यासाठी लोणी काळभोर (ता. हवेली) येथे बुधवारी (ता. २१) चित्रकला व रांगोळी स्पर्धेचे आयोजन करण्यात आले होते. या स्पर्धेत तब्बल १२०० हून अधिक विद्यार्थ्यांनी उत्स्फूर्त सहभाग नोंदवला, अशी माहिती जय भवानी ग्रुपचे अध्यक्ष ॲड. श्रीयश राहुल काळभोर यांनी दिली.
शिवजन्मोत्सवानिमित्त जय भवानी ग्रुपच्या वतीने तीन दिवस विविध कार्यक्रमांचे आयोजन करण्यात आले आहे. पाषाणकर बागेजवळ बुधवारी (ता. २१) सकाळी ११ ते दुपारी एक या कालावधीत रांगोळी स्पर्धा पार पडल्या. या स्पर्धेत १५० ते २०० विद्यार्थ्यांनी सहभाग नोंदविला. तर पृथ्वीराज कपूर मेमोरीयल हायस्कूलच्या प्रांगणात बुधवारी दुपारी चार ते सहा या वेळेत चित्रकला स्पर्धा पार पडली. यामध्ये पाचवी ते बारावी वर्ग गट आणि पहिली ते चौथी वर्ग गट असे दोन गट तयार करण्यात आले आहेत.
या स्पर्धेत लहान गटातील ३०० तर मोठ्या गटातील सुमारे ७०० विद्यार्थ्यांनी सहभाग नोंदविला. यावेळी पर्यवेक्षिका रेखा पाटील, कलाशिक्षक पराग होलमुखे, सैफुल शेख, कोमल काळभोर, मनोज माकणीकर व पालक मोठ्या संख्येने उपस्थित होते.
रांगोळी स्पर्धेतील प्रथम विजेत्याला सोन्याची नथ, द्वितीय विजेत्याला रेफ्रिजरेटर आणि तृतीय विजेत्याला स्मार्ट टीव्ही बक्षीस दिले जाणार आहे. तर पाचवी ते बारावीच्या वर्ग गटातील प्रथम विजेत्याला टॅबलेट फोन, द्वितीय विजेत्याला स्पोर्ट सायकल आणि तृतीय विजेत्याला स्मार्ट वॉच बक्षीस देण्यात येणार आहे. तर पहिली ते चौथीच्या वयोगटातील प्रथम विजेत्याला क्रिकेट किट, द्वितीय विजेत्याला स्कूल किट आणि तृतीय विजेत्याला कलर किट अशी बक्षिसे देण्यात येणार आहेत. याचा बक्षिस वितरणाचा सोहळा गुरुवारी (ता. 22) पाषाणकर येथे होणाऱ्या कार्यक्रमात होणार आहे.
दरम्यान, लोणी काळभोर येथील पाषाणबागेजवळ गुरुवारी (ता. २२) सायंकाळी सहा वाजता शिव व्याख्याते प्राध्यापक नितीन बानगुडे पाटील यांचे व्याख्यान होणार आहे. नितीन बानुगडे हे प्राध्यापक व्याख्याते आहेत. त्यांनी शिवाजी महाराज, संभाजी महाराज, जगणे समाजासाठी, नाते संस्कारांचे, यशवंतराव चव्हाण अशा वेगवेगळ्या विषयांवर व्याख्याने दिली आहेत. त्यांच्या व्याख्यानांना हजारोंच्या संख्येने गर्दी जमते. त्यामुळेच लोणी काळभोर येथील त्यांच्या व्याख्यानाला प्रचंड गर्दी होण्याची शक्यता आहे.
याबाबत बोलताना जय भवानी ग्रुपचे अध्यक्ष ॲड. श्रीयश काळभोर म्हणाले की, शिवजन्मोत्सवानिमित्त तीन दिवस विविध कार्यक्रमांचे आयोजन करण्यात आले आहे. लोणी काळभोरमध्ये पहिल्यांदाच शिव व्याख्याते नितीन बानगुडे पाटील यांचे व्याख्यान होणार आहे. या कार्यक्रमाला लोणी काळभोर व परिसरातील नागरिकांनी मोठ्या संख्येने उपस्थित राहावे, असे आवाहन काळभोर यांनी केले आहे.
