पुणे : विधानसभा निवडणुकांचा कार्यक्रम जाहीर झाला असून राज्यात आता राजकीय घडामोडी घडताना दिसत आहे. अशातच आता इच्छुक उमेदवारांच्या मुलाखती देखील पक्षांकडून सुरू आहेत. काल भाजपचे प्रदेशाध्यक्ष चंद्रशेखर बावनकुळे यांनी पुणे शहरातील उमेदवारांच्या गाठी भेटी घेतल्या आहे. अशातच भाजपचे पुण्यातील वडगाव शेरी विधानसभा मतदारसंघाचे माजी आमदार जगदीश मुळीक यांनी चंद्रशेखर बावनकुळे यांची भेट घेतली आहे.
जगदीश मुळीक वडगाव शेरी विधानसभा मतदारसंघात लढवण्यासाठी इच्छुक असल्याचे बोलले जात आहे.मात्र, हा मतदारसंघ अजित पवार गटाकडे असून सुनील टिंगरे हे विद्यमान आमदार आहेत. आता ही जागा भाजपाला सोडावी अशी अनेक दिवसांपासून चर्चा सुरू असतानाच जगदीश मुळीक या मतदारसंघाबाबत चर्चा करण्यासाठी चंद्रशेखर बावनकुळे यांच्या भेटीला आले असल्याची शक्यता वर्तवण्यात येत आहे. आता हा मतदारसंघ अजित दादा भाजपला सोडणार का? याकडे सर्वांचे लक्ष लागून आहे.
चंद्रशेखर बावनकुळे नेमकं काय म्हणाले?
महायुतीतील जागावाटपावर बोलताना भाजप प्रदेशाध्यक्ष चंद्रशेखर बावनकुळे म्हणाले की, 90 टक्के जागेवर एकमत झालं असून बाकी लवकरच होईल आहे. दिल्लीला जाहीरनाम्यासाठी जात आहे, केंद्र आणि राज्य सरकार हे जनतेकरता काम करणारं आहे. केंद्रात आणि राज्यात डबल इंजिन चांगले काम करेल. महाविकास आघाडी राज्याचा बट्ट्याभोळ करेल, असा टोला देखील यावेळी बावनकुळे यांनी लगावला आहे.
महायुतीत उमेदवारीवरून वादाची ठिणगी पडणार नाही..
विधानसभा निवडणुकीच्या उमेदवारीबाबत आमच्या संसदीय मंडळाची बैठक पार पडली आहे. उमेदवारी कोणाला द्यायची, हा निर्णय सर्वस्वी संसदीय मंडळाचा असणार आहे. त्यामुळे विधानसभा निवडणुकीची उमेदवार यादी लवकरच जाहीर होईल, पण केव्हा हे मी सद्या सांगू शकत नाही. महायुतीत ज्याला उमेदवारी मिळेल, त्याचे काम सर्वजण करतील. निवडणुकीत आम्ही गुणवत्ता आणि निवडून येण्याच्या निकषांवर उमेदवारी देतो आहोत. महायुतीमध्ये ‘नंबर गेम’ राहिला नाही. त्यामुळे आम्ही जागावाटपात अडलेलो नाही. ज्या मतदारसंघात ज्या मित्र पक्षातला उमेदवार जिंकू शकतो, तिथे तडजोड करून उमेदवार दिला जाईल. महायुतीत उमेदवारीवरून वादाची ठिणगी पडणार नाही, याची आम्ही काळजी घेऊ, असं देखील चंद्रशेखर बावनकुळे यांनी म्हटलं आहे.
