पुणे : ‘मला उधारीवर माल देऊ नकोस असे दुकानदाराला का सांगितले’, याच कारणावरून दोघांमध्ये कडाक्याचे वाद झाले. या वादातून बिल्डिंगच्या टेरेसवरुन ढकलून देत खून केल्याची खळबळजनक घटना घडली आहे. १३ नोव्हेंबरला रात्री बारा वाजण्याच्या सुमारास वडगाव शेरी येथील संजय गांधी सोसायटीमध्ये ही घटना घडली. बैजू लक्ष्मी मंडल (वय ३५, रा. संजय गांधी सोसायटी, वडगाव शेरी) असे खून झालेल्या व्यक्तीचे नाव आहे.
याप्रकरणी मृत बैजू याचा मित्र संतोष कोंडीबा गिनलवाड (वय-३२, रा. संजय गांधी सोसायटी, वडगाव शेरी) यांनी चंदननगर पोलीस ठाण्यात फिर्याद दिली. शंभु दपी राम (वय ४७, रा. संजय गांधी सोसायटी, वडगाव शेरी) याच्यावर गुन्हा दाखल करुन अटक केली आहे.
पोलिसांनी दिलेल्या अधिक माहितीनुसार, खून झालेला मृत व्यक्ती आणि आरोपी हे एकाच ठिकाणी राहतात. बैजू आणि आरोपी शंभू यांच्यात सोमवारी रात्री वाद झाला. बैजू याने शंभूला ‘मला उधारीवर माल देऊ नकोस, असे तू दुकानदाराला का सांगितले’ असा जाब विचारला. त्यावेळी दोघांमध्ये बाचाबाची झाली.
याचाच राग मनात धरून आरोपी शंभु राम याने बैजू मंडल याला जीवे मारण्याच्या उद्देशाने बिल्डिंगच्या टेरेसवरुन खाली ढकलून दिले. यामध्ये गंभीर जखमी झालेल्या बैजू याचा दुर्दैवी मृत्यू झाला. घटनास्थळाचा पंचनामा करुन पोलिसांनी आरोपीला अटक केली. पुढील तपास सहायक पोलीस निरीक्षक घोरपडे करीत आहेत.
