पुणे : अरिजीत सिंह हा सध्याच्या तरुणांचा आवडता गायक आहे. त्याचे लाईव्ह गाणे ऐकणे हे अनेकांचे स्वप्न असते. अनेक तरुणांच्या तोंडी सध्या अरिजीत सिंहचे गाणे दिसते. प्रसिद्ध गायक अरिजित सिंह याचा पुण्यातील कार्यक्रम जाहिर होताच काही दिवसांतच तो कॉन्सर्ट पुढे ढकलावा लागला आहे. याला कारण देखील तसेच आहे. कॉन्सर्ट जाहिर होताच काही दिवसांतच तो ‘ओहर फ्लो’ झाला आहे. त्यामुळेच नियोजित कार्यक्रम पुढे ढकलण्यात आला आहे. आता या कार्यक्रमाची तारीख बदलली आहे. गायन प्रेमींनी पहिल्या काही दिवसातच ‘तिकट’ फुल केल्याने या कार्यक्रमाचे ठिकाण देखील बदलावे लागत असल्याचे आयोजकांनी सांगितले.
पुण्यात अरिजीत सिंहच्या कॉन्सर्टला कायम तुफान गर्दी होते. त्यातच कॉन्सर्टची तारीख जाहिर होताच या तिकिटांची विक्री मोठ्या प्रमाणात झाल्याने कॉन्सर्ट पुढे ढकलावा लागला आहे. आता उशीरा का होईना, पण अरिजितच्या आवाजाने पुन्हा पुणेकरांचे काळीज धडधडणार आहे. अरिजित सिंहचा कॉन्सर्ट ३ मार्चला होणार होता आता हे कॉन्सर्ट १७ मार्चला होणार आहे. २५ हजार लोकांची क्षमता असलेलं ठिकाण या कॉन्सर्टसाठी निश्चित करण्यात येणार आहे.
पुण्यातील प्रसिद्ध टू-बीएचकेकडून गेल्या वर्षी ‘राजा बहाद्दुर मिल्स’ येथे गायक अरिजित सिंहचा कार्यक्रम घेतला होता. त्याला रसिक पुणेकरांनी प्रचंड दाद दिली होती. त्यानंतर पुन्हा एकदा अरिजीत सिंह पुण्यात कॉन्सर्टला येणार होता. मात्र, तारिख जाहिर होताच या तिकिटांवर पुणेकर तुटून पडले. काही क्षणांतच तिकिटे फुल्ल झाली. अनेक नवीन गायकांना आणि संगीतप्रेमींना अरिजीत सिंहचा कॉन्सर्ट बघायचा असतो. या सगळ्यांचा हिरमोड होऊ नये म्हणून कॉन्सर्टची तारीख आणि जागा बदलण्यात आली आहे.
प्रत्येक प्रेमात पडलेल्याला आणि प्रेमभंग झालेल्याला अरिजीत सिंह सावरुन नेतो असं नेटकऱ्याचं म्हणणं आहे. त्यामुळे अनेकांनी त्यांच्या कॉन्सर्टच्या गाण्याची लिस्ट देखील तयार करत असतात. फिर ले आया दिल, कबीरा (ये जवानी है दीवानी), मस्त मगन (२ स्टेट्स), जुदाई (बदलापुर), चन्ना मेरेया (ए दिल है मुश्किल), तुम ही हो (आशिकी २), दुआ (संघाई), गेरूआ, इलाही (ये जवानी है दीवानी), नशे-सी-चढ गई (बेफिक्रे) या गाण्यांची चाहते नेहमीच फर्माईश करतात.
