पुणे: पुण्यातून एक धक्कादायक घटना समोर आली आहे. पुणे-सातारा महामार्गावरील सारोळे येथील नीरा नदीच्या पुलाखाली पोत्यात भरलेल्या अवस्थेत एक मृतदेह आढळला आहे. या मृतदेहाच्या उजव्या हातावर ‘ओम ‘ असे गोंदलेले आहे. यावरून खुनाचा छडा राजगड पोलिसांनी लावला आहे. याप्रकरणी अवघ्या बारा तासाच्या आत आरोपींना पोलिसांनी बेड्या ठोकल्या आहेत.
सारोळा येथील नदीपात्रात मृतदेह आढळला होता…
अधिक माहिती अशी की, सारोळा येथील नदीपात्रात रविवारी(9 मार्च) सकाळी एका अनोळखी व्यक्तीचा मृतदेह आढळून आला होता. मृताच्या हातावर ‘ओम’ असे गोंदलेले होते. त्या अनुषंगाने पोलिसांनी तपास सुरू केला. तपासात ससाणे नगर परिसरात अशा वर्णनाचा एक व्यक्ती बेपत्ता असल्याचे समोर आले. त्यावरून या मृत व्यक्तीचे नाव सिद्धेश्वर भिसे (वय 35 ) असल्याचे उघडकीस आले. यानंतर मृताची पत्नी योगिता भिसे (वय 30 ) आणि तिचा प्रियकर शिवाजी बसवंत सुतार (वय 32 ) यांना पोलिसांनी अटक केली.
दोघांचे लग्नाआधीपासून प्रेमसंबंध होते?
मिळालेल्या माहितीनुसार, त्यानंतर राजगड पोलिसांनी सिद्धेश्वर याची पत्नी योगिताची चौकशी सुरू केली असता धक्कादायक खुलासे समोर आले. तपासाच्या सुरुवातीला तिने उडवा उडवीची उत्तरे दिली. मात्र, पोलिसांनी कसुन चौकशी केली असता तिने खून केल्याची कबुली दिली. योगिता व तिचा प्रियकर शिवाजी यांचे लग्नाआधीपासून प्रेमसंबंध होते. प्रियकर शिवाजी लग्नानंतरही योगीताला भेटण्यासाठी गावावरून येत होता. दोघांच्या प्रेमसंबंधात मृत सिद्धेश्वर अडचणीचा ठरत असल्याने दोघांनी मिळून कट रचत 3 मार्चच्या मध्यरात्री सिद्धेश्वरचा गळा दाबून त्याचा खून केल्याचे समोर आले आहे. हा खुन करणाऱ्या पत्नीला आणि तिच्या प्रियकरला पोलिसांना बेड्या ठोकल्या आहेत.
