पुणे : विधानसभा निवडणुकीसाठी उमेदवार यादी जाहीर करण्याच्या शर्यतीमध्ये बुधवारी (दि. २३) सायंकाळी शिवसेना (उद्धव बाळासाहेब ठाकरे) पक्षाची यादी जाहीर करण्यात आली आहे. या पहिल्या यादीत ६५ जागा जाहीर करण्यात आल्या असल्या तरी अजूनही पुण्यातील जागा जाहीर करण्यात आल्या नाहीत. उबाठाची यादी जाहीर झाल्यानंतर पुण्यात किमान तीन जागा मिळणार असल्याची चर्चा होती. मात्र, अखेर दोन जागा मिळणार असल्याचे पक्षातील सूत्रांकडून सांगण्यात आले.
त्यानुसार उबाठाने हडपसर आणि कोथरूडची मागणी केली आहे. कोथरूड विधानसभा मतदारसंघात यापूर्वी महायुती आणि मनसेच्या उमेदवारांची घोषणा करण्यात आली आहे. तर हडपसर विधानसभा मतदारसंघात ही महायुती आणि मनसेच्या उमेदवारांची घोषणा करण्यात आली आहे. येत्या दोन ते चार दिवसांत कोथरूड आणि हडपसरची घोषणा होईल, असा दावा करण्यात येत आहे.
