जुन्नर (पुणे) : राष्ट्रवादी काँग्रेस पक्षाचे अध्यक्ष शरद पवार हे आपला मोठा जनसंपर्क आणि अचाट स्मरणशक्तीसाठी पुण्यासह राज्यभरात ओळखले जातात. शरद पवार यांच्या याच गुणांचा प्रत्यय नुकताच पुणे जिल्ह्यातील जुन्नर तालुक्यात झालेल्या एका कार्यक्रमात शरद पवार बोलत होते त्यावेळी आला आहे.
शरद पवार हे या कार्यक्रमात बोलायला उभे राहिले आणि एका कार्यकर्त्याने जोरदार घोषणाबाजी द्यायला सुरू केली. यावेळी गर्दीत घोषणा देणाऱ्या या कार्यकर्त्याला पवार यांनी एका क्षणात ओळखलं आणि त्यांचा नामोल्लेखही केला. शरद पवार यांच्या या कृतीनंतर कार्यक्रमास्थळी टाळ्या आणि शिट्ट्यांचा कडकडाट झाला.
दरम्यान, पुण्यातील जुन्नर आंबेगावमधील विघ्नहर सहकारी साखर कारखाना लि. आसवणी आणि इथेनॉल प्रकल्पाच्या विस्तारणीकरणाचा उद्घाटन समारंभ नुकताच पार पडला. या कार्यक्रमाला शरद पवार यांच्यासह काँग्रेस नेते बाळासाहेब थोरात, आमदार अतुल बेनके, माजी आमदार शरद सोनवणे यांच्यासह अनेक मान्यवर उपस्थित होते. उद्घाटन पार पडल्यानंतर उपस्थित शेतकऱ्यांना संबोधित करण्यासाठी शरद पवार उभे राहिले होते.
त्यानंतर समोर बसलेल्या एका कार्यकर्त्याने शरद पवार आणि राष्ट्रवादी काँग्रेसच्या समर्थनार्थ घोषणा देण्यास सुरुवात केली. या कार्यकर्त्याकडे बघत कोंढाजी वाघ हेच आहेत ना? असं व्यासपीठावरून पवार यांनी विचारलं. त्यावर समोरून होकारार्थी उत्तर आलं आणि पवारांच्या स्मरणशक्तीने उपस्थित इतर नेत्यांसह नागरिकही अचंबित झाले. शरद पवार यांच्या पवारांच्या स्मरणशक्तीची जोरदार चर्चा सुरु आहे.
