-संतोष पवार
पळसदेव : क्रीडा व युवक सेवा संचालनालय महाराष्ट्र राज्य द्वारा जिल्हा क्रीडा परिषद व जिल्हा क्रीडा अधिकारी कार्यालय पुणे, यांच्या संयुक्त विद्यमाने आयोजित राज्यस्तरीय शालेय सायकलिंग ट्रॅक स्पर्धेत पळसदेव (ता . इंदापूर ) येथील श्री पळसनाथ विद्यालयाच्या खेळाडूंनी चमकदार कामगिरी केली.
बुधवार (दि. 18 डिसेंबर) रोजी श्री शिवछत्रपती क्रीडा संकुल म्हाळुंगे – बालेवाडी (पुणे) येथे संपन्न झालेल्या राज्यस्तरीय शालेय सायकलिंग ट्रॅक स्पर्धेत पळसनाथ विद्यालयाच्या हरीश दीपक डोंबाळे या सायकलपटुने 19 वर्षे वयोगटातून राज्यस्तरीय शालेय सायकलिंग ट्रॅक स्पर्धेत प्रथम क्रमांक पटकावला तर 17 वर्ष वयोगटातुन राज्यस्तरीय शालेय सायकलिंग ट्रॅक स्पर्धेत विद्यालयाच्या ओंकार जोतीराम गांधले या सायकलपटुने प्रथम क्रमांक मिळविला.
या दोन्ही खेळाडूंची रांची (झारखंड) येथे होणाऱ्या राष्ट्रीय (नॅशनल स्पर्धा) शालेय सायकलींग ट्रॅक स्पर्धेसाठी निवड झाली आहे. राष्ट्रीय सायकलींग स्पर्धेसाठी निवड झालेल्या यशस्वी खेळाडूंचे व मार्गदर्शक क्रीडाशिक्षक सिकंदर देशमुख, नितीन जगदाळे, रामचंद्र वाघमोडे, सुवर्णा नायकवाडी यांचे पळसनाथ शिक्षण प्रसारक मंडळाचे अध्यक्ष भूषण काळे, सचिव योगिराज काळे, संस्थेचे सर्व पदाधिकारी, विद्यालयाचे प्राचार्य विकास पाठक पर्यवेक्षक संजय जाधव यांनी अभिनंदन केले आहे.
