अमोल दरेकर
Sansavadi News : सणसवाडी : तळेगाव ढमढेरे हद्दीतील सणसवाडी- तळेगाव ढमढेरे रस्त्यावरील कारभारी मळा येथील प्राईमा पेपर कंपनीजवळ टॉरेटो कंपनीच्या गॅस पाईप लाईनला गॅस गळती झाल्याने आग लागली.
रस्त्याच्या कडेला ऊसाची शेती व लोक वस्ती असून आग नियंत्रणात आल्यामुळे मोठा अनर्थ टाळला आहे. या आगीची तीव्रता आणि आवाज एवढा मोठा होता की, लोक भयभीत होऊन त्या ठिकाणाहून लांब गेले. या रस्त्यावर मोठ्या प्रमाणात कामगार, विद्यार्थी, शेतकरी, शेतमजूर यांची ये-जा होत असते. तसेच महाराष्ट्र विद्युत मंडळाची विद्युत वाहक ताराही आगीजवळच जवळच होत्या. आग इतकी भयावह होती की, आगीचे लोट अंदाजे बारा ते पंधरा फुटापर्यत उंच हवेत वाहत होते.
आगीची माहिती देण्यासाठी कुठेही फलक नसल्याने नागरिकांना काही समजत नव्हते. अथक प्रयत्नानंतर आग आटोक्यात आणण्यात यश जरी आले असले, तरी नागरिकांच्या मनात भीतीचे वातावरण तयार झाले आहे.
