पुणे : वाडिया महाविद्यालयाच्या आवारात शिरलेल्या चोरट्यांनी चंदनाची झाडे कापून नेल्याची घटना उघडकीस आली. याविषयी वाडिया महाविद्यालयातील सुरक्षारक्षक बाबूराव श्रीपती गजेशिव (वय ६०, रा. बोरीभडक, ता. दौंड, जि. पुणे) यांनी कोरेगाव पार्क पोलीस ठाण्यात फिर्याद दिली आहे. वाडिया महाविद्यालयाच्या आवारात मध्यरात्री चोरटे शिरले.
महाविद्यालयाच्या आवारात असलेल्या कला शाखेच्या इमारतीपासून काही अंतरावर असलेली चंदनाची दोन झाडे चोरट्यांनी कापून नेली. पोलीस हवालदार जढर तपास करीत आहेत. शहरात गेल्या वर्षभरापासून चंदन चोरीच्या घटनांमध्ये वाढ झाली. चोरट्यांनी शिक्षण संस्था, शासकीय कार्यालये, सोसायटीच्या आवारातून चंदनाची झाडे कापून नेली आहेत.
