लोणी काळभोर : धर्माच्या रक्षणासाठी व निजामाविरुद्ध अखंड लढा उभारणारे संत सेवालाल महाराज यांची जयंती लोणी काळभोर (ता. हवेली) येथे गुरुवारी (ता.१५) पारंपारिक पद्धतीने साजरी करण्यात आली.
लोणी काळभोर येथील बंजारा समाजाच्या वतीने संत सेवालाल महाराज यांच्या जयंतीनिमित्त विविध सामाजिक उपक्रमाचे आयोजन करण्यात आले होते. यावेळी लोणी काळभोर गावातून भव्य मिरवणूक काढण्यात आली होती. बंजारा समाजातील महिलांनी कलश डोक्यावर घेतला होता. त्यानंतर मिरवणूक छत्रपती शिवाजी महाराज उद्यानात आल्यानंतर संत सेवालाल महाराज यांच्या प्रतिमेला पुष्पहार अर्पण करून अभिवादन करण्यात आले. तसेच विधीवत पूजा करून होम हवन प्रज्वलित करण्यात आले.
यावेळी बंजारा क्रांतीदल विचारमंचाचे पुणे जिल्हाध्यक्ष गोपाळ राठोड व बंजारा क्रांतीदलाचे लोणी काळभोर अध्यक्ष कमलेश राठोड व बंजारा समाजाचे नागरिक मोठ्या संख्येने उपस्थित होते.
