Rupali Chakankar On Rohini Khadase : राष्ट्रवादी काँग्रेस शरद पवार गटाच्या खासदार सुप्रिया सुळे आणि अमोल कोल्हे यांच्यावरून राष्ट्रवादी काँग्रेसच्या दोन्ही गटाच्या महिला प्रदेशाध्यक्षांमध्ये आता चांगलीच जुंपली आहे. रुपाली चाकणकर यांनी सुप्रिया सुळे आणि अमोल कोल्हे यांच्यावर टीका केल्यानंतर राष्ट्रवादी काँग्रेस शरद पवार गटाच्या महिला प्रदेशाध्यक्षा रोहिणी खडसे यांनी जोरदार पलटवार केला आहे.
रूपाली चाकणकर यांनी खासदार सुप्रिया सुळे आणि खासदार डॉ. अमोल कोल्हे यांच्याबाबत केलेल्या वक्तव्यावर रोहिणी खडसेंनी जोरदार प्रत्युत्तर दिले आहे. सुप्रिया सुळे आणि अमोल कोल्हे यांना अजितदादांनीच निवडून आणले आहे असे काहींचे म्हणणे आहे. माझं त्यांना एक सांगणं आहे, पहिले तुम्हाला किमान नगरसेवक पदासाठी निवडून आणून दाखवावं, मग आम्ही बाकीच्या तुमच्या गोष्टी मान्य करु असे रोहिणी खडसे यांनी म्हटले आहे.
काय म्हणाल्या रुपाली चाकणकर?
रुपाली चाकणकर म्हणाल्या की, अजित दादांवर बोलणारे दोन्ही खासदार दादांमुळे निवडून आले आहेत. सुप्रिया सुळे, अमोल कोल्हे अजितदादांमुळेच खासदार झाले आहेत. दादा सोबत नाही म्हणून तळ ठोकावा लागत आहे. सुप्रीया सुळे गेली 15 वर्ष अजितदादांमुळे निवडून आल्या आहेत. बारामती लोकसभा मतदारसंघामध्ये अजित पवार राष्ट्रवादी गट आणि महायुतीचा उमेदवार निवडून येईल. अजित पवारांनी विरोधी पक्षांमधील नेते असो अथवा अजित पवारांचे समर्थक, अनेकांनी अजित पवार लवकरच मुख्यमंत्री होतील असा दावा केला आहे.
