पुणे : दोन दुचाकीवरुन आलेल्या चौघांनी पत्ता विचारण्याच्या बहाण्याने एका व्यक्तीला चाकूचा धाक दाखवून लुटल्याची घटना नगर रस्त्यावरील वाघोली येथे घडली. या गुन्ह्यातील चार आरोपींना पेलिसांनी नागरिकांच्या मदतीने पकडले. गुन्हेगारांना अटक केली आहे.
खांदवेनगर, वाघोली येथील ब्ल्यू इन हॉटेलच्या पुढील बाजूस सोमवारी (ता. २५) पहाटे तीनच्या सुमारास ही घटना घडली होती. याबाबत सुखदेव महादेव निंबाळकर (रा. वाघोली, पुणे) यांनी लोणीकंद पोलीस ठाण्यात फिर्य़ाद दिली. यावरुन नितीन दिनेश बुटीया (वय ३१, रा. भिमनगर, बीटी कवडे रोड, पुणे), विकास सुरेश वाघरी (वय २२, रा. शिवाजीनगर), राहुल आनंद वाघरी (वय २८, रा. मिठानगर, कोंढवा), राहुल संतोष वाघरी (वय २०, रा. जेजुरी) यांच्यावर गुन्हा दाखल करुन अटक केली आहे.
या घटनेबाबत पोलिसांनी दिलेल्या माहितीनुसार, फिर्यादी सुखदेव निंबाळकर हे खांदवेनगर, वाघोली येथील ब्ल्यु इन हॉटेल समोरील रोडवर घरी जाण्यासाठी थांबले होते. त्यावेळी दोन दुचाकीवरुन आलेल्या चौघांनी त्यांना ‘येरवडा कोठे आहे?’ अशी विचारणा केली. फिर्यादी येरवड्याकडे जाण्याचा मार्ग दाखवत असतानाच आरोपींनी त्यांना चाकूचा धाक दाखवून लाथा-बुक्क्यांनी मारहाण केली. तसेच त्यांच्या खिशातील १,३०० रुपये व मोबाईल घेऊन पळ काढला.
फिर्यादींनी आरडाओरडा केल्यानंतर नागरिकांनी व पोलिसांनी आरोपींना पकडले. निंबाळकर यांनी दिलेल्या तक्रारीवरुन चौघांवर गुन्हा दाखल करुन अटक केली आहे.
